Column Jan de Jong, column

Gepubliceerd op 11 november 2015 | door Webloug

0

‘Echt woar’ column van Jan de Jong

Echt woar

Hai luip ter ook maank. Hoorntjes op kop, n pielsteert en n cape om haals knupt. En wieder kiender
mit alerhande gebèlskoppen. Halloween.

‘De Duvel,’ zee ol man en stak handstok ien lucht.
t Hemd trilde ons kwoajonges dou aan t gat.
‘Wazzen gonnent dij laankoet dood bie stroat laggen, of zo mor dood ien bèr. Apmoal haren zai swaarte en vurege steeën aan haals. Hai haar heur nek omdraait. En voak wazzen t ook nog wel doar ie t nait van docht haren. n Boerenaarbaider het ais vrezelk mit hom vochten, hail naacht laank. En der wazzen der meer bie ons op t dörp.’
Ol man keek ons bielaangs en stak stok vernijs ien lucht en speerde. ‘Nooit allinneg ien duustern bie pad, dou der denken om. En aalweg floiten of housten. Zo ontkommen ie aan hom. Bie t eerste lichten dut e niks meer. Doar wordt Duvel aibels gramniedeg van. Nou begriepen ie ook geliek dat ter nog wel ais zegd wordt van ain dij aarns tegen is: hai knist ter tegen as duvel bie t eerste lichten.’

Halloween. Onschuldege folklore? Kiender ien aanroaken brengen mit wereld van de boze?
Kiender dij heur verklaiden as heksen, gaisten of kebouters. Ondenkboar, dat christen-olders toustoan of aanmoudegen dat kiender heur mit zukse duvelse machten beklaiden, al is t mor veur de grap.
En paas op, wel mit Halloween snoepkes oetdailt brengt aigliek n offer aan ofgoden en komt ien aanroaken mit kwoaie gaisten.

De vreze des heren is t begun van kennis en wieshaid.
Leer kiender dat de Biebel de betraauwboare bron van woarhaid is.
En nog meer ien folder van Bijbel&Onderwijs, dat as kiender mit maskers bie joe aan deur kommen, geef heur gain snoepkes, mor dizze folder* mit veur heur ollu.

‘En vergeet nait,’ zee ol boas dou nog, ‘elk minsk is ja n zundoar.’

Grode minsken. Kiender en feesten.
Nou kriegen wie ook nog Sint Martinus bie deur laangs, Sunnerkloas mit peerd over dak en ien vlaigende voart Kerstman ien zien arreslee mit rendaaier der veur. Haildaal van Noordpool ofkommen.

En gelukkeg veur aal leutje wichter, èn heur pabbes. Vrizze wichter, K3 blift bestoan.

*Bron: http://bijbelenonderwijs.nl/occult-en-licht/3979/

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

19 + zestien =

Terug naar boven ↑
  • Literatuur activiteiten

    Geen nieuwe activiteiten