Column Jan de Jong, column

Gepubliceerd op 17 juni 2016 | door Jan Glas

0

‘Echt Grunnegs?’ column van Jan de Jong

Echt Grunnegs?

Bàts. Roamkes rabbeln van keukendeur. Kat stoft oet deus achter kaggel mit n dikke steert en kikt
verdwoasd om hom tou. ‘Zo!’ Mannes ropt n stoul onder toavel vot en slagt ain bain over d’aander.
Kloeten bragel valen van stevel. ‘Kovvie! t Ol mìnsk lag zo-even dood, haildaal ien n bult, mit aarms
stief om kaggel. Zuneghaid. Oet, vanzulven.’
Kinoa schommelt noar t aanrecht. ‘Ook kouk?’
‘Wat dochs. k Bin vot op zuik goan. Verdamme! Gain sìnt ien hoes. Ik kin wel janken. Dij groapert
het veurtied n stee kòft doar boven. Aal sìnten gongen noar kerk zaag k op ofschriften.’
‘t Is wel dien moeke, hur.’ Kinoa zet kovvie mit kouk veur hom op t swilk.
‘Dat maal wief!’ Hai wist: ‘Zit gain botter op.’
‘Mekaaiert die niks aan handen, wel?’

Nee dit kin nait. Dit heurt nait. Zo schrieven?

Mannes komt schraiwend ien keuken en let hom deelvalen aan toavel. Hai snokt, mit kop ien baaide handen. ‘Vrezelk. Moeke is oet tied kommen.’
‘Och mien laiverd toch. Wat ja aarg.’ Kinoa schommelt om toavel, legt hom n haand op scholder en krigt heur buusdoukje. ‘Wils meschain kovvie?’
‘Joa. k Heb heur ien koamer vonden, stoef veur kaggel. Op zuik noar waarmte. Ain en aal goudeghaid.
Ales is gelukkeg noar n goud doul goan zaag k op ofschriften. Kerk.’
‘Aarm mìnskie toch.’ Kinoa zet kovvie veur hom op toavel.
‘Joa. t Aarme schoap.’

Kiek, zo maggen wie t groag lezen. Nait din? Of…?

Mannes zet auto noast hoes en lopt achterom. Ien keuken geft e Kinoa n dikke smok. ‘Nou, thoeszörg het moeke vonden vanmörgen. Laankoet ien koamer. t Was al te loat. Dokter docht dat zai naachts al oet tied kommen was.’ Hai drukt kovvieapperoat aan. ‘Doe ook?’
‘Joa dou mor. Ik docht al, wat bis ja vro thoes. Gelukkeg het zai nait leden. Wel din?’
‘Nee. Asjeblieft.’ Mannes zet kovvie op toavel. ‘Ik goa der dommee geliek weer hin, boudel regeln.’ Hai krigt zien tillefoon oet buus.
‘Ik goa wel mit die mit.’

k Wait t nait. Toch aans. Dat is vandoag. Gain vrouger.
Al is t wel echt Grunnegs gelukkeg.
Komt ain oet tied.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

2 + negentien =

Terug naar boven ↑
  • Literatuur activiteiten

    Geen nieuwe activiteiten