Column Jan de Jong, column

Gepubliceerd op 7 juli 2015 | door Webloug

0

‘Dunder en bliksem’ column van Jan de jong

Dunder en bliksem

Roeg weer op t Drenthelaand. Noazoaten van ons hunebedbaauwers haildaal oet stuur en ien hokken.
Loes van der Loan, weervraauw van RTV Drenthe let weergoden lös over t haaidelaand ien t Veenkolonioals. En dat is gain Drents, mor Grunnegs.
Oere, let Onan de Batavier en Ellert en Brammert t mor nait heuren.

Jan Germs, directeur van Huus van de Taol het geliek bui votjagd. t Moakt nait oet of Loes nou Drents of Grunnegs sprekt. Streektoal lopt ien nkander over. t Is n ‘non-discussie’.

Geert Kocks (soamensteller van het Woordenboek van de Drentse Dialecten) het t Drents verdaild ien zeuven hoofdvarianten en zo nuimen zai dat nou apmoal Drents. t Veenkolonioals, toal van Twijde Monders, heurt doar volgens Kocks ook bie. Jan Germs sloet hom doar geern bie aan.

Toch bekende geluden. Varianten, wie hebben heur ien t Grunnegs ook. Net as aigenzinneg gehikhak.
Wat is nou echt Grunnegs en wel sprekt t nou goud oet.
Bie ons op t Grunnegerlaand meschain nog n stuk of wat Hogelandsters dij haardop heur aigen Evangelie preken van, ‘bie ons op t dörp zeggen wie t zo en nait aans! En dat is echt Grunnegs.’ Aal aandern doun nait mit en willen wie niks van waiten.
t Gaait om de lesten ducht mie.

Vandoag de dag kinnen jonges heur deur hail pervinzie n wicht oetzuiken. Zunder n ontvangst aan raand van t dörp veur n pak haauw. En din ook nog wonen goan doar t wicht votkomt.
t Gevolg. Ons streektoalfunctionoares zag al ien Vroag&Antwoord dat veul woorden oet verschillende varianten deur hail Grunnen sproken worden.
Aal varianten deur nkander hin dommee? Komt dit wel goud.

Bie ons nait. t Is nait meer goud kommen.
n Grunneger mit n Drenthie.
Dat was laggen dou verkeren eerste moal over vlouer kwam mit heur ‘vogelies mit verechies’ en vruig om n ‘lepelie’ bie kovvie.
Ik kin t vergeten.
Drenthe het wonnen. Praoterij van niks. n Beetie van törf en n beetie van daor gunder van klaai.
Mor nog veul minder, gain woonderij op t Grunnegerlaand. t Tocht heur doar te bot.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

2 × 1 =

Terug naar boven ↑
  • Literatuur activiteiten

    Geen nieuwe activiteiten