Column Tonko Ufkes, column, goed lek

Gepubliceerd op 28 maart 2015 | door Webloug

0

‘Dunder’ column van Tonko Ufkes

Dunder       

Aalgedureg hol ik de lucht ien e goaten want wel wiet gijt t goed en komt e dunderbui eerst as k bij de bus ben. Gaauw droaf ik tussen de marktkroamkes deur, mor veurbij de Korenbeurs vuul k fiene druppen. As k n mement stoan blief om mien dampende bril ien e rugzak te doen en dan meteen t regenjaske pak, schoeft één vlak laangs me. Dat kon mien nije buurvraauw wel es weden – Marja of zukswat hiet ze – die handeg n grote rooie paraplu openklapt en rusteg de stroat ienkuiert, ok richteng station.

t Duurt eefkes veur k het regenjaske aan heb en ientussen stroomt me t wotter al ien e ogen. n Endje veur me moet mien buurvraauw lopen en noa n poar beste stappen zie k heur al:

‘Moi wicht, ik ben ok onderweegs noar de bus, misschien pazzen we der beiden onder?’ Ik buk en k schoef handeg noast heur. Krekt op tied, want host geliek brekt zo’n enorme onweersbui lös dat ik Marja n portiek ientrek. De grote rooie paraplu hangt klem boven ons en ok wij stoan stief tegen nkander aan.

Noa n schofke wordt e regen gelukkeg wat minder en wij wringen ons weer uut e portiek; met e ene haand hol k de druppende paraplu hoog en met e aander haand omklem ik mien bibberende buurvraauw. Zo lopen we zwiegend richteng station tot Marja ieneent links n ziedstoat ien wil en we haalf tegen mekoar aan botsen, mien haand glidt van heur scholder. Vuur schut uut heur ogen as ze tegenover me stoan gijt en noar mien haand gript, met doarien de paraplu. En nou ze zo recht veur me stijt, zie k dat ze mien nije buurvraauw hielendal niet is.

‘Geef hier dat ding!’ bit ze me toe en toegelieks trekt ze mien aarm noar beneden. De grote rooie paraplu klettert op e gele stenen. De vraauw pakt hum op, gijt vannijs veur me stoan en zunder dat ik argens op verdocht ben hoalt ze met e vlakke haand uut. Het kletst op mien linkerwang, t overstemt roem n loate dunderslag.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twee + 14 =

Terug naar boven ↑
  • Literatuur activiteiten

    Geen nieuwe activiteiten