Column Hindry Schoonhoven

Gepubliceerd op 11 februari 2015 | door Webloug

4

‘Dubbelklikken’ column van Hindry Schoonhoven

Dubbelklikken

Mien ollu binnen babyboomers. Doar is bie mien waiten gain Grunneger woord veur en loaten wie dat ien vredesnoam zo holden. Wèl zol t Grunnegers nog wat ien reken hebben as ons streektoal noa bultenbroezer en gleerbred ook nog potjeknappers te verduren krigt? Nait doun.

Mor ik haar t over mien ollu. Loaten wie t ter mor op holden dat zai van even noa oorlog binnen. Net as veul lu van dij generoatsie hebben zai heurzulf de òfgelopen joaren nuver vertraauwd moakt mit computers en internet. Ien t begun heb k heur n beetje op glee hulpen. Veul ferduutsie haar k ter nait ien da’k heur biebrengen kon hou of je mit Windows omgoan mozzen en hou of je dingen downloaden en zukswat. Mor t duurde mor even of ze haren boudel onder knij. Nog aal komt ter n extroa bril bie op en mout laamp even feller, mor t gaait meroakel. Kevòrten veur nijjoarskoartjes kommen zulfs te printer oet. Ik dou heur t nait noa.

Ien t veuren haar k nooit bedenken kind wat of t stoerste wezen zol ien dat leerproces. As je doagelks mit n computer waarken, is dubbelklikken net zo vanzulfsprekend as oademhoalen en noar schiethoes goan. Mor veur pa en moeke was elke dubbelklik n digitoale tamtoatsie. Moes verschoof heur aal, twijde klik kwam veuls te loat of ze hillen knop te laank vast. n Groetjeboudel wer t. Gain bestand ston nog op goie stee.

Zukswat overkwam mie ook dou k aanderhalf joar leden veur eerste moal Grunneger toalcursus gaf. Ik mouk mie benoam bunzelachteg om stoere onderwaarpen as vervangende infinitieven, alternerende waarkwoorden en gruine volgorde. Dat was naargens veur neudeg, want elkenain haar t votdoadelk deur.

Woar k allain nait op rekend haar, was dat lu dij nait mit t Grunnegers groot worden binnen gain onderschaaid moaken kinnen tussen klokje (n leutje uurwaark) en klokje (n borrel). Zai zeggen en heuren twij moal dezulfde o. Geft niks, heur k joe zeggen, want n alloziewinkel verkocht mainsttied toch gain draank. Is ook zo, mor hou mouten zai din waiten wat ‘doe mos’ betaikent? Antwoorden kinnen je mailen noar mien ollu.

Bio Hindry Schoonhoven.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



4 Responses to ‘Dubbelklikken’ column van Hindry Schoonhoven

  1. Potjeknappers … Joa, t opbedenken van nijmoodse Grunneger woorden is slim stoer, as je nait willen dat t kolderiek wordt.

  2. Hindry Schoonhoven says:

    As je nait oppazen, kriegen je Vloamse toustanden.

  3. Henk Scholte says:

    (In een draaiboek voor een RONO-klankboek over Kneels ter Loan, uitgezonden op 6 juli 1963, geschreven door David Hartsema, staat het woord oetfaden, “Groningers” voor uitfaden, een half Nederlands half Engels woord dat in de radiowereld het langzaam wegdraaien van het geluid betekent.
    Kneels ter Loan zal misschien nooit geweten hebben dat dit soort nieuwvormingen het Gronings zijn gaan sieren. Hij had wellicht meer gevoeld voor ..öfsmoren” of, mooier nog, „oetfaailen” (uitdweilen) of „oetfiedeln” (uitwrijven). Vooral dit laatste woord lijkt me heel aardig te passen bij het radiowezen.

  4. Frans says:

    Mei wat Beerenburg yn e beulch is it bêst te ferstean.
    Mooi waark man!
    Groetnis,

    Frâns.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

1 + negen =

Terug naar boven ↑
  • Literatuur activiteiten

    Geen nieuwe activiteiten