Column Jan de Jong, column

Gepubliceerd op 5 november 2015 | door Webloug

0

‘Dood tij’ column van Jan de Jong

Dood tij

‘Zee ropt mie!’
Vraauw kikt over bril. ‘Joa, dat zel.’
‘Ik kin doar niks aan doun. t Zit no ainmoal ien t bloud.’ Ik krieg jes oet t halletje. ‘Kin k die nog aarns bliede mit moaken?’
‘Joa, dommee oet de buurt blieven.’
Haha, aal week t zulfde.

Bie viskroam op maart zet k fiets op stander.
Alerhande soorten vizzen kieken mie aan. Mit of zunder ogen, zulfs gonnent mit zunder kop.
Visboer het haitied wel proats en wichter binnen ook nait op heur mondje valen.
Hai langt mie mien zolte heerns aan. Vroagen dut e al nait meer.

Ain dij verlet om n proatje het mout veur oardeghaid ais bie n viskroam op maart stoan goan.

Gedachten goan eefkes weerom. Woar is tied bleven, dat wie bie Bocht van Woatum en Spiek achter diek gingen visken. Lienen zetten, bot prikken, aliekruken en mozzels zuiken.
t Is verboden, of wordt haildaal niks meer vongen en dat ie vangen kinnen ie beder swimmen loaten om der nait zaik van te worden.

Weerom goa k wat hondekoekjes hoalen bie daaiernspezioalzoak .
Aigenoar is aquariums aan t aanhemmeln. ‘Pak die dat blad mor ais van teunbaank,’ zegt e.
Veurop staait: “Kijken naar vissen kan bloeddruk verlagen.”
Van vizzenkommen en aquariums bie dokter en tandarts ien wachtkoamer worden mìnsen rusteger.

Onderzuikers oet Amerikoa schrieven dat. Zai hebben fysieke en mentoale reacties meten van mìnsen dij noar vizzen keken. Is dudelk verschil te zain aan blouddruk en haartslag.
En hou meer vizzen, hou meer bliedeg en minder vranterg.

‘k Heb prachtege aanbiedingen.’ Hai wist noar alerhande aquariums mit “Actie!” der op.
Man,’ zeg k. ‘Ik heb ain thoes zitten dat as k allinneg mor mond lös dou en zai heurt à … is t al nee. En blouddruk heb k tebletjes veur. k Wait nait wat of goudkoopste is vanzulf.
Mor t klopt wel hur. k Heb net nog bie ain zien vizzen keken. Ik bin eerst weer n zetje rusteg.’

k Vroag mie òf houlaank wie ons nog n viske kopen kinnen. Vangsten worden minder en vizzen der nait dikker op. Zulfs van genoaten vangen zai de leutjekes al.
Aan aanderkaant, wie hebben ons waddenzee toch? Onze kroamkoamer.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

dertien + 16 =

Terug naar boven ↑
  • Literatuur activiteiten

    Geen nieuwe activiteiten