Column henk puister, column

Gepubliceerd op 2 november 2015 | door Webloug

0

‘Diskremenoatsie’ column van Henk Puister

Diskremenoatsie

Was n dikke stroomsteuren. Pech. Meleur de kak. Mit rooie koppen vol niedsk glinsternde swaitdruppen vlogen lu hèndeweer mit snouers, droaden en wat aal meer. Pergram begunde wat loater, mor bleef genogt tied veur n verhoal, laidjes en t gesprek van radiomoaker Gerard Lunshof mit ons streektoaltroebedoer Hans van der Lijke, woonachteg in n Daam. Is wat moois op komst: n bak mit mor laifst vaar spaigelploaten van dizze toalkunstenoar. Noa uutzenden was t even uutpoesten en stoom ofbloazen aan gezelleghaidstoavel in ketine.
Proat ging over technische tekörtkomens, toal, meziek, asielzuikers, zörge veur ons olden. Hans, dij noast mie zat, zee woorden in dizze traant: ‘…Vrougerjoaren wuiren kinder mit rood hoar oetscholden en ploagd tot en met… Was nooit aine bie dij n klacht indainde wegens diskremenoatsie, bie mien waiten.’ Kinder sloekden t, gingen gewoon heur gaang. Fèlsten huigen derop mit klombe, beten taanden kepot van verniendhaid. Roodhoaregen stonden ja bekind as striedboar. Rooien binnen kwoaien, was aalgemaine taim.
Zol der nooit beudeltje mit rood hoar stillechies in n hörntje treurd hebben? n Kind wil derbie heuren. Nait aans wezen as n aander.
Zesteger joaren veurege aiw: opkomst van beatmeziek, laank hoar, körde rokken. k Was ofwachtend, teruggetrokken mor k wol tougelieks middenmaank t oaventuur. Wat n stried thuus! Op stroade wuist noatjaauweld: ‘Hé, provo! Lopst mit kapper zien sinten in buutse. Slont! Vieze tekkel!’
Bepaalde kefees en daansgelegenheden kwamst nait in. Boazen namen die nait aan, of ontsluigen die as t mor aits kon. Diskremenoatsie. Mor soamen stondst staark. Gafst gain krimp. Wolst zain loaten woarst veur stondst: vrijhaid van denken, van ideoalen.
Schouljong van zestien. k Dee vekaansiewaark bie n kweker op Sapmeer. Op n dag, onder schafttied, keek boas mie aan en zee: ‘Ale laankhoaregen binnen veur AJAX mor waarken ho mor!’ Wat heb ik mie in swait bozzeld veur hom om tegendail te bewiezen. Tot bloudens tou. Hai haar mie net woar e mie hebben wol.
Dou wos k nog nait dat tegen domhaid gain kruud wozzen is.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

zestien + 11 =

Terug naar boven ↑
  • Literatuur activiteiten

    Geen nieuwe activiteiten