Column Jan de Jong, column

Gepubliceerd op 8 augustus 2016 | door Webloug

1

‘Dino’s’ column van Jan de Jong

Dino’s

‘Opa?’ t Hail spul zit achter aan grode toavel.
Ik leg laptop op t toaveltje. ‘Wat is der wel nait dat ik kommen mout.’
Oma staait der ook op kop en oren bie. Is n aalbum volplakt, mit ploatjes van dinosauruzzen.
‘Wie haren vrouger prachtege aalbums,’ begun ik.
‘Pa, hol joe ais even stil.’ Dochter trekt mie aan aarm. ‘Kieken.’ Zai holdt heur mobieltje boven n ploatje.

Op t schaarmke kropt n leutje dinosaurus oet n aai, kikt mie aan en lopt over toavel, stopt eefkes, schudt t lief en kop, kikt mie nog ais aan en runt wieder om kovviekopkes tou. Lopt mie n rillen over rug. Ik kiek noast tillefoon en der achter op toavel. Niks te zain. En din vernijs weer op t schaarmpke. Dino dut bek lös en ik n stap noar achtern. Oere!

Ik zet gat weer op baank.
Rizla vogelploatjes, Kaptein Grant bootploatjes, segoarebandjes en sukkerzakjes plakten wie. En boeten speulen. Overaal en stevels aan. Of as koiboi, of indioan. Op joardag kreeg we n holster mit pistool en n houd. Ook nog wel ais n geweer. Zo ain mit n kurk veurien. Taauwtje derof en mikken op koekoek as dij oet zien hokje kwam. Of der kwam n stuk kerton teveurschien as t pepier van t kedo òf was. Onder rekkertjes zaten der n rubbern dolk en n biel. Om n aander mit op kop te haauwen en t hoar derof te snieden. Mainsttied was der ook nog n verentooi bie. Wie kropen en slopen maank boskederij en deur onderwaal. Wat loater werden wie ook nog ridders. Swoarden, speren, hoorntaauw mit blokken holt, en ol wasoaker en potdeksels om ons te beschaarmen.
Nou speulen zai op spelletjescompjoeters en iPads. Gain haauwerij mit roomsen, vrijgemoakten en openboaren. n Veurdail is dat zai kop nait stukkend kriegen en aal geleuven kinnen vrij over stroat.

Ik kin der nog nait bie. Vrouger haar k geliek roupen van dat kin of bestaait nait.
Mor ais eefkes Googeln.
Doar hes t al. Freek Vonk het ons veur t zootje. Niks nait miljounen joar leden. * Allinneg Biebel is betraauwboar. Doarien zels t woord dinosaurus nait tegenkommen.

Ik kiek even noar grode toavel. Nee, mor nait doun.

*Bron: http://dinodino.nl/

Tags: , ,



One Response to ‘Dino’s’ column van Jan de Jong

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

zeven + 9 =

Terug naar boven ↑
  • Literatuur activiteiten

    Geen nieuwe activiteiten