Column Jan de Jong, column

Gepubliceerd op 14 december 2016 | door Webloug

0

‘Degelk’ column van Jan de Jong

Degelk

As k mie buk om n olwievenkouk oet schap te kriegen ien supermaarkt kin k net mien gat intrekken.
Stòft n jonge moeke mit n kaar om houk, stopt, kikt n moal of wat links en rechts, blast mit onderlip t
hoar boven ogen vot en runt weerom.
Zit n leutje jonkje veur ien kaar. t Gezichtje misstaait nait bie Elstar abbels ien mien mandje.
Oogjes goan drok hinneweer. Doar zit e, middenmaank roek van zuitighaid en alerhande kleuren.
Smarties, spekjes, beertjes, dropkes, marsjes en nutsjes. Aarmkes binnen net te kört. Baintjes vruzzeln
noar holvaast. Hai rekt en rekt en kin hom naarns aan ofzetten. Din zigt e mie. Ogen worden nog
groder. Rad kikt e hinneweer om hom tou en din gaait mond lös. Brandweer, plietsie, en ambelaans.
Hai kin heur aalmoal. Zien moeke komt op n draf om houk. Kikt mie aan en dut wenkbraauwen
omhoog.
Ik laag mien laifste laag en krieg mie gaauw n kouk. Twij oma’s ien t gaangpad kieken. ‘Ik zol t wel
waiten,’ zegt ain.
Haha, joa. As k no ais mien olderliek gezag van joaren ervoaren dail? Nait doun.

Wat loater bie kassa stoan moeke en t jonkje veur mie. Hai het ogen en waangen nat, kikt duuster en
het aarmpkes over nkander. Maalkopt.
‘Jij lust vast wel wat,’ zegt t wichtje van kassa tegen hom. Zien moeke dut geliek n stap noar veuren
en schoft kaar gaauw deur. ‘Hij mag niks hoor! Zeker geen zoetigheid!’
Wicht achter kassa gniflaagt, krigt n mand mit alerhande fruit aarns onder vot en holdt t jonkje dij veur.
‘Asjeblieft, zoek maar uit.’
Hai snoft en kikt zien moeke aan. Din krigt e hom rad n banaan. ‘Asseblie…,’ zegt e weerom.

Mien leutje bruiertje kreeg n zuurtje van winkelmevraauw vrouger. Mit aander haand hil hai moeke
stief vaast.
Oma kreeg deus mit zien schountjes dij net kocht wazzen. ‘Wat zegstoe din?’
Zai prikte hom nog ais eefkes stief mit n vinger op zien jaske. ‘Nou?’
Bruiertje keek moeke aan. Ien stilte boog hai hom kop en zöcht maank n leren lucht op vlouer.
Dou stìnde hai eefkes, volde handjes, gloop schaif omhoog en dee ogen dicht: ‘Here… zegen deze
spijzen… amen.’

Boeten haar e hom oetspijd. t Was n zoere.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

7 + 3 =

Terug naar boven ↑
  • Literatuur activiteiten

    Geen nieuwe activiteiten