Column Jan Glas

Gepubliceerd op 14 september 2017 | door Jan Glas

2

‘De Hockney van Podderwoldseweg’ column van Jan Glas

De Hockney van Podderwoldseweg

Ienainen bin ik weer twinneg en stoa bie open veurdeur van n flatje op tiende verdaipen aan Podderwoldseweg en zai ien gaang n kunstwaark hangen van David Hockney. Aigenoares is n laange, moagere vraauw. Ze is wiskundege is mie verteld. Ik zeg heur hou biezunder ik t vien dat ze wat van Hockney het. Mit: ‘Het is grafiek, hoor,’ klaineert ze de weerde van heur bezit. Mor ik vien t hail biezunder. Veur t eerst zai ik n Hockney ien t echt.

Ik was doar om bouken te bezörgen, besteld bie boukhandel Vos woar ik doudestieds waarkte. Op mien negentiende was ik, fris van middelboare schoul, aannomen as jongste bedainde. Dat hil – noast o.a. de retouradministroatsie, de oetgoande post, t geld noar baank brengen, oetpakken van deuzen mit bouken en op alfabet ienvougen van bouken – ien dat ik zo’n twij doagen per week op fiets bouken bezörgen mos deur hail stad. Lu konden tillefonisch bestellens opgeven en dij werden deur de jongste bedainde aan hoes brocht. k Bezörgde ook op verschaaiden instituten van Universiteit. Ain moal mos ik deur n hoag van betogende studenten bouken oflevern bie perfester Bladergroen, dij volgens de woedende studenten hopeloos olderwets les gaf. t Instituut was zodounde bezet. Dat ging zo ien dij tied. Loader binnen der schoulen noar zulfde perfester verneumd, dat ze het vervaast ook wel wat goud doan.

Ik docht terug aan mien eerste Hockney deur n bouk dat ik besteld haar. Nou, farreg joar loader, kin dat per internet. Op Marktploats von ik veur drij euro n olle, dikke vaailingcatalogus moderne kunst van Sotheby’s. Dij wer bezörgd deur postbode. Der ston n veurschets van Hockney ien. Ik heb sunt mien eerste Hockney al hail wat meer ien t echt zain, mor pas bie dizze klaaine veurschets kwam dij Hockney van Poddersoldseweg mie weer ien t zin.

De bedere en boetendes ook nog ais socialistische boukhandel Vos was der nait veur de gewone man of vraauw. Klanten dij bieveurbeeld om n streekroman vroagen durfden werd deur de boas filaain winkel oet hoond. Aan vaste en veuraal hoogopgelaaide klanten wer gain ‘nee’ verkocht. Was n mit spoed besteld bouk nait op veurroad din mos ik laans ale boukhandels ien Stad om t bewuste bouk ien handen te kriegen. Bie boukhandel Berghuis, woar t altied n zootje was, mor ook Godert Walter, bie n jonge Erik Kweksilber. Ik mos veuraal nait vergeten n rekentje te vroagen op aigen noam, genain mog waiten dat Vos zien handel via andere boukhandels opkrikte. Boukhandel Vos is al laank vot, Berghuis ook, net as zoveul boukhandels. Godert Walter is der nog aal. Op kop òf al 75 joar.

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , , , , , ,



2 Responses to ‘De Hockney van Podderwoldseweg’ column van Jan Glas

  1. Goffe Jensma says:

    Ik herinner me nog dat ik eens bij Vos was (zal in de jaren zeventig zijn geweest) en dat Herman Brood er binnenliep. Heb je misschien ook een boekje met Amerikaanse slang-woorden voor me, meneer Vos?

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

10 + tien =

Terug naar boven ↑
  • Literatuur activiteiten

    Geen nieuwe activiteiten