Algemeen geert teis

Gepubliceerd op 6 september 2017 | door Jan Glas

0

Crowdfunding Grunneger film d.m.v. bouk over Geert Teis

Stichten Grunneger Film waarkt aan Nedersaksische produksie

De stichten Grunneger Film is aan loop mit n biezunder en uniek prejekt: n speulfilm woarin meerdere Nedersaksische dialekten proat worden. Dat is in t belang van d’ontwikkeln van de streektoal en de streekaigen kultuur. In de film proaten d’akteurs heur aigen variaant van t Nedersaksisch. Zo prat biev. n Grunneger boer Grunnegs tegen n Drìntse wetholder dij in Drìnts antwoordt. Meschain wordt t zulfs n grìnsoverschriedende produksie en komt noast verschaaiden Grunneger dialekten, Drìnts en Stellenwaarfs ook t Plattdüüsch aan bod.

Veur de film is geld beschikboar moakt deur o.m. de pervinzies Grunnen en Drìnte en n aantal Grunneger en Drìntse gemaintes. De kosten binnen doarmit nog niat haldaal dekt. Joe as streektoallaifhebber kinnen helpen t budget rond te kriegen, mit n zgn. crowdfunding-aksie.

Knoalster schriever Harry Töben (ook sikketoares/puutholder van de stichten Grunneger Film) brengt eerdoags zien bouk Geert Teis Pzn oet. Veur dit bouk het Töben t waark van Geert Teis (G.W. Spitzen, 1864-1945) nij leven inbloazen, deur zien verhoalen en teneelstokken vernijs op te schrieven in de toal zo as dij op t heden in de Knoalstreek proat wordt. In Teis zien gedichten kon de verolderde toal voak nait vervongen worden, doar het Töben t olle woord stoan loaten en verwezen noar n nijmoodser woord.

Deur dit unieke bouk te kopen steun je t prejekt ‘Film in streektalen’ en moak je de produksie van de film meugelk. t Wordt n specioale oetgoave en komt nait in de winkel. Verkoop is bloots bie inschrieven. Noam en woonstee van de koper kommen achter in t bouk te stoan. Boetendes wordt de koper nuigd veur de boukprezentoatsie in Theater Geert Teis op Knoal en, veur zowied der ploatsen binnen (vol=vol) veur de VIP-première van de film. t Bouk verschient allinneg as der minstens 250 exemploaren verkocht worden, aans is oetgoave nait meugelk. t Bouk kost € 48,-. De netto-opbrengst van om en bie € 20,- is bestemd veur de film Liek achter de badde van de stichten Grunneger Film. De schriever en oetgever worden nait betoald.

Bestel joen exemploar van Geert Teis Pzn veur moandag 18 september bie Harry Töben op
hatoben@online.nl. De stichten Grunneger Film is n Algemeen Nut Beogende Instelling (ANBI), aankoop van t bouk is doardeur òftrekboar van de belasten.

Meer info: www.grunnegerfilm.nl

Dizze tekst is n vertoalen oet t Nederlands deur Bert Wijnholds.

Tags: , , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

negen − 1 =

Terug naar boven ↑
  • Activiteiten