Literatuur

Gepubliceerd op 23 juni 2014 | door Webloug

0

Column Fieke Gosselaar over WK voetbal

Ofgelopen vrijdag las Fieke Gosselaar weer heur column veur op Radio Noord. Dit moal over WK voetbal, der is ja even niks aans as voetbal. Column is HIER te heuren, ongeveer op 10 menuten noa t begun.

WK kieken

Smörns haar ik anderhaalf uur vertroaging mit traain op weg noar Leeuwarden deur n seinstoring. ‘As t vanoavend mor nait weer gebeurt. Den wor ik gek’, zee collega.
   Mor alles ging goud op weeromraaize.  Wel zat der n man dij zoch totoal nait bezeg huil mit WK, mor mit zien problemen mit GGZ. n Haalf uur laank zat hai in zochzulf te proaten over aine Suzanna, n GGZ-hoer -zoas hai heur nuimde, of t was zien ex-vriendin mit wel hai roezie haar en nait veur zochzulf kon zörgen, mor GGZ deed t nait goud, GGZ dee dit en GGZ dee dat, GGZ dee alles verkeerd. GGZ kwam sikkom in elke zin veur, GGZ moakte der n klotenzooi van, GGZ was haildaal niks. GGZ dit en dat en hai roasde n haalf uur zo deur, totdat wie in Stad aankwamen.
    Man luip as eerste noar deuren tou. n Haalf uur was elkenain om hom hin stil west. Nou laagden minsen opgelucht dat hai t allinneg tegen zochzulf haar. ‘Ik docht nog,’ zee n wichtje, ’zol ik tegen hom zeggen dat dit n stiltecoupé is? Moar dat dee ik toch moar nait.’
  Ik stapte rusteg op mien fietse op weg noar vrund, laif en voetbalwedstried. Precies om zes uur haar vrund t eten kloar en tegeliek mit de oftrap nam ik mien eerste hap riest.
   Vrund zee: ‘In Berlien kwam ik n wichtje tegen oet Australie, dij proatte hail haard, hail luudruchteg. Ik huif nait noar Australie.’
   Laif zee: ‘Ik vin t n saaie wedstried,’ net veur de goal van Robben.
   Vrund zee: ‘ Waist dat ze meten hebben dat Robben 37 kilometer per uur lopen kin?’
   Wie missen de 1-1. Op ain of aandere menaaier kiek ik ook net aandere kaante op bie 2-1 veur Australie.
   ’t Is verschrikkelijk slecht,’ zee Youri Mulder.
   Vrund zee: ’t Is ook biegeleuf as je nog nooit van n ploug wonnen hebben.’
   Commentator zee: ‘Nog tied genog veur n daarde goal.’ Bie daarde goal kiek ik toevalleg net op facebouk, weer n goal mist.  Gelukkeg herhoalen ze dat der vlak noa.
   3-2 veur Nederland, Gelukkig mor, aans was t haaile oavend: Oranje dit, Oranje dat, Oranje dee alles verkeerd, Oranje moakte der n klotenzooi van, enzovoort.

Fieke Gosselaar

(foto: Jan Glas)

Tags: , , ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten