Literatuur

Gepubliceerd op 13 juni 2014 | door Webloug

0

Column Fieke Gosselaar over heur olde sloapkoamer

Elke vrijdag leest Fieke Gosselaar n column veur tiedens De Centrale op Radio Noord. Ditmoal binnen der ook fans bie, dij Fieke n leuk wicht vienden. Column gaait dizze week over de nije sloapkoamer van heur nichtje, zulfde sloapkoamer van dou Fieke n luk wichtje was. Luuster via dizze LINK, vanof ongeveer 10 menuten.

Nije sloapkoamer

Mien leutje nichtje loat heur nije sloapkoamer zain, mien olle sloapkoamer, en doarveur was hai van de zus van mien voader.
   ‘Eerst waren de muren geel,’ zegt ze.
   ‘Ik wait t,’ zeg ik en kiek deur t roam polder in. Snaachts as ik mien ogen opendee, was t net zo donker as mit mien ogen dicht. As der ain auto polder oet kwam rieden, zagst t licht verschoeven op de gerdienen tot t weer duuster was en stil. ‘Bist nait baange doar?’ vruigen klasgenootjes dij in t dörp woonden bie stroatlanteerns, moar dat was ik nait.
   Mien nichtje wiest noar de vogeltjes op heur nije behang en ik zeg hou mooi t is. Mien bruier is bezeg mit t schuren van paneeldeure dij veur inbaauwkaaste zat. Hai is altied bedekt mit behang west en nou wordt hai rose mit paars vaarfd. In kaaste, aargens tussen vlouer van t hoes, was der ooit n hail moezennust doodgoan, zodat ik der moanden nait sloapen kon vanwege de stank. Sums kinst de muffe geur nog zaacht roeken.
   Deur mien aandere twij roamen kiek ik op t dak van schure, rode dakpannen waren de hoogte in legd en noast nander. Swaalfkes vlogen der mor net boven. Houveul dakpannen zitten der op n schure van zesteg meter laank? Ik krieg altied n vrumd gevuil as ik in polder geroamtes van schuren zai, half instört en der gebeurt niks meer mit. Sums gruit der n boom tussen twij dikke balken, toene was ooit n slingertoene. As t hail steveg störmde heurdest wind zoch tussen alle kieren van t dak paarzen, schure reerde mit open muil. Veur mie bleef hai altied stoan, zo groot en staark, as de dakpannen golfden soamen in ain gehail.
   Ondertussen help ik mien olders mit t deuzen inpakken. n Poar uur hoalen wie bouken noar beneden, stoppen ze in deuzen en sjaauwen ze t karnhoes in, zesentwinteg volle deuzen. Bouken zulfs nog van mien opa en oma stoan der tussen, oorlogsbouken, Nederlands-Indië, t keuningshoes, verzetsgroup t Zwaantje, Agatha Christies, toenbouken, insektenbouken, bouken van Finnerwol tot Garrelsweer en Woltersum en fotoalbums van vrouger.
   ‘Kiek, Fieke in de box’, zee mien moeke.

Tags: , ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten