Literatuur

Gepubliceerd op 23 januari 2014 | door Webloug

0

Column Fieke Gosselaar ‘Onder onze pervinzie’

Elke vrijdagmörn, aargens tussen 10 en 12 uur, leest Fieke Gosselaar n Grunneger column veur ien t RTV Noord-radiopergrammoa De Centrale. Veurege week vrijdag 17 jannewoarie las Fieke dizze column veur. Column is HIER te beluustern, ongeveer op 20 minuten vanof begun van t uur.

Onder onze pervinzie

Molletje groafde n laange gang mit zien stieve olle groafklaauwen. Hai was oldste mol van zien familie en zien klaauwen waren mui van t groaven. Kilometertunnels het hai mokt deur haile pervinzie hin: van Oethoezen tot aan Ten Boer en van Appingedam tot aan Winsum. Hai haar dikste klaauwen van mollenkolonie en n poar joar leden was hai nog oetroupen tot beste groaver van pervinzie Grunnen. 

En nou zat hai al n oneindege tied vast in n doodlopend stok grond. Ainzoam wachtte hai op zien kammeroaden, moar gainaine kwam hom zuiken. Hai kon zoch herinnern dat hai lekker aan t groaven was, dou hai inains zien kop steuten haar tegen n zwoare iezern piep. t Was zo’n haarde knal dat grond der van trilde en zien tunnel instörtte. Pas noa n poar minuten wos hai weer woar hai was, liek onder Loppersum. 

Molletje wreef over zien kop, keek noar zien klaauwen dij hom tot vandoage aan tou nog nooit in de steek loaten haren. Hai schrok dou hai zien doeme zag, dij schaif stond en nog zeerder dee as zien kop. Hai prebaaide in zien ingestörte gaange weer n beetje roemte te kriegen om te oademen, mor mit ain klaauw ging dat n stok langzoamer. Noa uren van zaand aan kaante schoeven lag hai eindelk goud en doarnoa viel hai in n daipe, daipe sloap.

Opains begon grond opnij te trillen, nog haarder as toun hai zien kop steuten haar. Molletje wos nait wat hom overkwam en roakte toch n beetje in paniek. Haildaal allinneg onder de grond von hai nog nooit zo eng! Hai haar zulfs t gevuil dat hai nog wieder noar beneden aan t zakken was. Zol dat meugelk wezen, vruig hai zoch òf, en hai herinnerde zoch dat zien opa hom vrouger woarschaauwd haar. Zien opa vertelde over n tied dat de iezern piepen in de grond brocht waren, haile mollenkolonies mozzen verhoezen, omdat piepen dwars deur alle hoezen hinlegd werden. 
‘Rücksichtsloos!’ haar zien opa roupen. ‘Wacht mor, wacht mor tot de grond zakt!’

Zien opa’s woorden moakten Molletje staarker as nooit teveuren. ‘Ik mot omhoog!’ zee hai en zette zien schaive doeme in ain beweging recht. As mit twij plougscheren sneed hai de grond open en boande zoch n weg noar boven.  t Duurde moar even dou hai blaauwe locht weer zag en zunne op zien zere kop vuilde schienen. Hai jankte zo haard dat alle regenwormen ook noar boven kwamen, zodat hai veur haile mollenkolonie soavends n woar feestmoal haar. 

(Foto: © Jan Glas)

Tags: ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten