Column column jan glas

Gepubliceerd op 28 februari 2015 | door Jan Glas

0

‘Coke’ column van Jan Glas

Coke

Ien onze prachtege hoofdstad, woar altied wat te beleven vaalt, zat ik soavends loat mien vetzucht ien n snackbar te stillen dou der n vìnt op mie òf kwam: Hé, kun je coke voor me regelen?’ Ik wait dat k n olle junkenkop heb. Dat summegen doar n bepoald leven aan koppeln kiek ik nait meer van op. ‘Nee,’ zee ik kortof. Hai wol t nait geleuven: ‘Nee?’ ‘Ik verkoop geen coke.’ ‘Echt niet?’ ‘Echt niet.’ ‘Ik geef je een goeie prijs,’ en hai neumde zien pries. ‘Moet je luisteren, ik woon hier niet eens,’ zee ik. ‘O, nee?’ kreeg ik oetdoagend weerom. Hai bleef stoan en keek mie strak aan, overtuugd was e nait, zag ik. Oetindelk laip e mor vot.

Aal etend draaide ik de korde scene nog ais vertroagd òf. Dat e mie nait leuven wol hil mie nog n zetje bezeg. Kaans dat e docht dat ik wel verkopen kón mor nait aan hom, omdat ik boudel nait vertraauwde.

n Poar joar leden las ik veur ien n kerkje aargens ien pervinzie. Noa ofloop stelde n man hom veur en zee dat ik femilie was van zien vraauw, zai was ook n Glas. Ik zee dat dat nait kon. Nou, volgens zien vraauw was dat wél zo. Ik haar t haildaal bie t verkeerde ind, kreeg ik deur. Ik legde oet woarom ik zo zeker van mien zoak was, ik ken noamelk ale Glazzen aan ons kaant. ‘Wacht mor,’ zee e, ‘ik bel mien vraauw wel even op.’ Dat dee e. ‘Ik stoa hier nou bie Jan Glas en hai beweert dat e gain femilie van die is.’

Man ston wat van mie ofwend terwiel e belde. Vanoet ooghouken keek e mie aan, mit zulfde blik ien ogen as dij vìnt ien Amsterdam dij zeker en vast wis dat ik coke veur hom regeln kon.

 

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

zeventien − twee =

Terug naar boven ↑
  • Literatuur activiteiten

    Geen nieuwe activiteiten