‘Chili con carne’ column van Tonko Ufkes

Chili con carne

Van e week mos mien vraauw onverwacht n poar doagen vot en e eerste oavend rommelde ik oavends wat onwenneg ien e keuken om. Och, veur mij allent huufde ik niet zo neudeg uutgebreid of iengewikkeld eten kloar te moaken. Laang leden aten we dan thuus ien zo’n geval broene bonen, met uutbakken spekjes en doar mosterd en piccalilly overhìn. En zodoende docht ik ieneent an t ooit beroemde Chili con carne: makkelk en goedkoop. Ien mien studentetied har k dat n nust kloarmoakt en al wis ik niet meer hoe of t smoakte, de rest wis ik nog best. Gaauw ben k noar de winkel fietst om gehakt, broene bonen, ananas, paprika en zuks wat en toen alles ien e pan zat, kwam vanzulf de rest: de toavel kloarmoaken met mor één bord en één lepel, de kraant der noast, n pilsje en bijpassende meziek. Toen draaide ik altied Supertramp of Santana, mor ploaten en n ploatenspeuler heb k niet meer. Gelukkeg von k onder t eten Supertramp en ok Santana weerom op e laptop ien e Spotify bestanden, de kraant kreeg k hielemoal uut en noa t eerste pilsje smoakte ok de tweede best. De yoghurt kon wel ien t zulfde bord, dan kon k – krekt as vroeger – de ofwas wel n dag uutstellen. Het wer n mooie oavend.

Eerst nou bedenk ik me, Chili con carne, hoe smoakte dat ok al weer?

Bio Tonko Ufkes.

Tags: chili con carne, column, Tonko Ufkes