Column Harry Niehof, column

Gepubliceerd op 8 februari 2016 | door Webloug

0

‘Café op driefklaai 3’ column van Harry Niehof

Café op driefklaai 3

1960, aarmoud ien t dörp

Waren der nou twij stoeten minder of leek dat mor zo? As stoet oet oven kwam, wer t op laange planken ien schuur zet om òf te koulen. Nou was der opains n leeg stukje plaank op t èn. ‘Het liekt wel of t störmd het,’ zee pa. Verder schonk e der gain aandacht aan. Mor n week loater was t weer zo ver, twij stoeten vot op t èn van plaank. Dou dat nog n keer gebeurde, kroop opa bezied achter bakfiets om te zain wat der loos was.
En joa hur, buurvraauw van n poar hoezen verderop kwam deur achterdeur ien schuur en laip der deur grote deur weer oet, mit twij stoeten onder jas. Dat kon makkelk, elk en ain laip bie mekoar ien en oet. Hou den ook, vanòf dat moment haitte dizze buurvraauw Opoe Störm. Mor wat mos je doarmit? Noar plietsie tou? Welnee, gewoon derhèn en zeggen: ‘Opoe Störm, nait weer doun.’ Kloar.
Der was begun joaren zesteg nog veul pure aarmoud ien t dörp. En net zo as van n baist of n plant ale dailen wel aargens veur bruukt werden, zo wer der ook van ale energie dij der was zoveul meugelk profiteerd. As vraauw Slagter povverd wilde, den mouk ze thoes t beslag, dee dat ien n tulbandpaan en brocht dij noar bakkerij, woar pa hom ien oven zetten. ‘Dij was ja toch aan.’
Zo bleven der voak ook lutje pooteerappels over dij allain mor geschikt waren as swienevouer, mor den mozzen ze wel goar wezen. Jan Eerbei haar twij staarke zeuns, dij kwammen mit n oaker vol ondermoatse pooteerappeltjes noar bakkerij tou om hom onder ien oven te schoeven. ‘Dij was ja toch aan.’
Soavends kwammen ze oaker weer ophoalen, en as ze goud en wel ien heur loopritme zaten, den kwammen der vanoet het niks opains drij jonkjes van Knol teveurschien, dij n greep deden ien oaker, heur vingers brandden en gaauw n poar eerappeltjes ien mond stoken. Veurdat jongens van Eerbei der wat aan doun konden, waren Knoltjes alweer vot. Ze haren altied honger.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

een × 1 =

Terug naar boven ↑
  • Literatuur activiteiten

    Geen nieuwe activiteiten