Column Harry Niehof, column

Gepubliceerd op 29 januari 2016 | door Webloug

0

‘Café op driefklaai 2’ column van Harry Niehof

Café op driefklaai 2

1960, Café E.H. Niehof II

t Café aan Delweg 1 was ook n stee woar spookachtege dingen gebeurden, nait wereldschokkend, mor toch. Zo verdwenen der voak messen en vörken oet bestekbak. Gainain dij wis woar ze bleven. Het roarste was dat der nooit n lepel ontbrak. Moeke telde ze òf en tou, en joa hur, weer twij messen en n vörk vot. Lepels waren altied compleet. Hail vrumd. En wat ook wel vrumd was, der lag n dooie kou op zolder.
Der ston ‘Café E.H. Niehof’ boven deurrit, mor dat was mor n dail van t bedrief. Het was ook n bakkerij – dat was belangriekste bron van ienkomsten – der was n grote bovenzoal veur bruloften en partijen en der was zulfs nog n staal, zo’n beetje noast bakkerij, woar mien opa nog swienen had haar. k Wait nait of Keuringsdainst der wel es kwam. Kortom, t was zo’n ollerwets pand tegen raand van t dörp aan, woar veul van t socioale gebeuren van de gereformeerden ploatsvon.
Toch was Café Niehof ook modern veur dij tied. Der wer ijs verkocht van Vami ijsfebriek, ‘de modernste van Europa’. En der was n automatiek mit apmoal lekkers der ien, dat was ook wat nijs. Mor hou mos dat op zundag? As goie christenen moggen mien ollu den vanzulf nait waarken, en doar haren ze t volgende op vonden: zotterdagoavend om vief veur twaalf stopte pa haile automatiek vol mit van alles en nog wat, en as mensen der den noa middernaacht wat oethoalden, tja, doar kon hai den ook niks aan doun…

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

1 × 3 =

Terug naar boven ↑
  • Literatuur activiteiten

    Geen nieuwe activiteiten