Column Harry Niehof, column

Gepubliceerd op 22 januari 2016 | door Webloug

1

‘Café op driefklaai 1’ column van Harry Niehof

Café op driefklaai 1

1960, Café E.H. Niehof I

‘Gaais mörn ook noar t voetballen kieken, Derk?’
‘Och joa, ik ken t wel wachten ja.’
Gegnivvel. Derk Beun haar ja allaank niks meer te doun. Hai was krap aan zeuventeg, haar goud boerd en zat overdag thoes mor n beetje te wachten tot t gezelleg wer ien t café. As t ainmoal zover was, den schoof e gaauw bie stamtoavel aan en bestelde n jonge kloare mit sukker, lepeltje derbie. Hai was zo’n beetje mit t meubilair mitverzekerd, zeg mor.
Dat meubilair stelde traauwens nait biester veul veur. Der ston n antieke baank dij ooit hail mooi west haar, en doarom was e den ook antiek. Tapkaast was gewoon n tapkaast, zunder tap vanzulf, want der was allain bier op vlès. Mien pa wipte kroonkörk deròf en gooide hom ien t doppengat, n lutje rond gat ien vlouer achter tapkaast woar e op t èn van oavend ale doppen dij nog op grond lagen ien veegde. Veur tapkaast ston stamtoavel mit aacht stoulen, t haart van jachtwaaid, woar ale staarke verhoalen verteld werden.
En reken mor dat der hail wat meer staarke verhoalen over stamtoavel gingen as vlèzzen staarke draank, want der was nait veul geld en elk mos t zuneg aan doun. Bier, jonge en olle kloare en sinas, dat was t wel zo’n beetje. En wèl hailemoal niks haar, dij kon n ‘aankled woddertje’ kriegen: kroanwodder mit citroen en n blokje ies, vergees.
Vertegenwoordeger veur dij draank kwam oet Stad. Ains ien moand kwam e mit bus noar Middelsom om bestellens op te nemen. Doarnoa lainde e n fiets van mien pa om ale krougen ien omgeven bie laans te goan. Op t èn van dag kwam e der weer aan slingern, blied dat fiets nog hail was, en stapte zo doen as n swien weer op bus noar Stad. Hai wel.

Tags: , ,



One Response to ‘Café op driefklaai 1’ column van Harry Niehof

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

twintig − drie =

Terug naar boven ↑
  • Literatuur activiteiten

    Geen nieuwe activiteiten