Column column jan glas

Gepubliceerd op 25 januari 2016 | door Webloug

1

‘Bowie en Beethoven’ column van Jan Glas

Bowie en Beethoven

Ik laag ofgelopen weken twij moal ien t zaikenhoes, mit allerhande ontstekens. Veuraal eerste opnoame, doags noadat ik allerleste Krödde noar drukker stuurd haar, was ik der nait best aan tou. Bezuik keek din ook oardeg bezörgd noar t zaike vogeltje aan t infuus, ien ber. Schier is dat ie joe haildaal overlevern kinnen aan verzörgen en ritme van de verplegen. Dat om zeuven uur smörns hemmen je, haalf dommelnd, al n bred eten op schoot en is t flink deurkaauwen, want t verloren gewicht mos der weer aan. Nou mot ik mien leven laank al ‘deurkaauwen’; ik kin hail goud ofvalen mor hail min aankommen, nooit van hoes zunder n plak of wat brood. Om tien uur komt thee, mit wat derbie. Stipt om twaalf uur mirregeten, om drij uur weer thee mit wat derbie en om zes uur waarm eten. k Laag hail dag te kaauwen en der ook wat tégen te kaauwen, want t eten is aans. Olderwetser. t Is slim deurkookt en stoet is sponsbrood, wat ik zulf nooit koop. Aal doagen kaauwen en toch weer n poar kilo kwiet. Dikke minsen, ze waiten nait haalf wat veur n mooi, makkelk leven ze hemmen. Wat n luukse, ais n dag of zulfs n week wat minder te eten.

Ien t zaikenhoes keek ik noar films en series op mien laptop en las bouken. Muziek luusterde ik nait, wel haar ik aal ‘It’s different when it happens to you’ ien kop, zongen deur Anita O’Day. En t is ook beslist “aans” as je zo ienainen achterover aan t infuus liggen. t Was t eerste laid dat ik draaide toun ik weer thoes was. k Mos mit Old en Nij nog n moal t zaikenhoes ien en doarnoa ging David Bowie dood. Bowie, de held van mien pubertied: troost en reddingsboei veur n homo-puber ien, godbedert, Oethoezen. Doagen noa zien dood heb ik allain noar muziek van Bowie luusterd, en noar Beethoven, pioano sonoates, aans nait. Zol der aargens n link wezen tussen Bowie en Beethoven, vroug ik mie òf en zocht op internet. Ik von dizze clip: n hond dij Beethoven hait is aan t rementen mit n kat dij David Bowie hait. Ze kinnen t goud mit nkander vienden, Beethoven was ja ook n ‘rebel’.

Tags: , ,



One Response to ‘Bowie en Beethoven’ column van Jan Glas

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vijf × 2 =

Terug naar boven ↑
  • Literatuur activiteiten

    Geen nieuwe activiteiten