Column Tonko Ufkes, column, goed lek

Gepubliceerd op 31 mei 2016 | door Webloug

0

‘Bosch ien e kop’ column van Tonko Ufkes

Bosch ien e kop

Gewoon, as altied, doe ik het.
Tot gustermiddag heb ik alles kloarmoakt: de panelen zoagd, schuurd en ien e grondvaarf zet, noatied de scharnieren der ienschroefd en as leste het lege drieloek dichtklapt. Zo blift het ok veur mij n wonder.
Nou druk ik op ‘alles openen’; bij de websites op òfbeeldengen en ok bij Instagram, bij Facebook en zuks schoakel ik alle teksten, ja, alle woorden en letters uut. Ien t lest stijt t hiele wereldwiede web open en eerst dan klik ik op t blokje zuuktermen en vul t onderwaarp ien. Vandoag wordt het n groot waark en ik typ ‘sorteren’ op: ‘Tuun van lusten’ veur t middenpaneel en ‘Parredies’ en ‘Muzikoale hel’ veur de klappanelen die an weerskaanten hangen.
Vanzulf duurt het even – tied veur n kop kovvie met wat lekkers – en dan druk ik noa n tiedje op ‘prent’, de enege knop die ik as kunstenoar zulf ienbaauwd heb, want die zit niet bij de standoard opties.
Het openklappen van dit nije waark is ok veur mij nog altied slim spannend, mor gelukkeg, t is weer wat moois worden. Ien e midden de wereld an blote mensen, n poar vogels en aander dieren, alles op gruun graslaand en ien blaauw wotter. t Ene ziedpanneel geft beelden van t parredies uut t begun van e Biebel, t aander panneel let e hel uut t leste Biebelboek zien.
t Liekt aalmoal goed, t is “exportkwaliteit” zel mien vraauw Aleyt vast zeggen as ze domt het drieloek zicht. Ik schenk alvast twee glaskes ien, al is t nog vroeg op e mörn, mor veur ik mienent leegdrink, sluut ik sekuur alle tabbladden en doarnoa stuk veur stuk de programma’s, eerst dan goan de apperoaten uut en worden verstopt. Eerst nou roep ik Aleyt.
Gewoon, as altied, doe ik het.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

negentien + acht =

Terug naar boven ↑
  • Literatuur activiteiten

    Geen nieuwe activiteiten