Column Eddy de Jonge, column

Gepubliceerd op 26 maart 2015 | door Webloug

1

‘Boris de Beuker is nait meer’ column van Eddy de Jonge

Boris de Beuker is nait meer

Op Dag van de Grunneger Toal was ik verwonderd deur de kaalmte van de meziek. Vief Grunneger en ain Drentse popband dij hail beheerst en smui heur programma deden. Dou Krödde speulde kwam n biezunder gevuil bie mie noar binnen, n nije ervoaren. Krödde is gesmeerde meziek: goie melodieën mit romantische teksten. Laidjes over de laifde! Prima band mit n huile goie zanger. Ik hol der van: couplet, refraain, couplet, refraain, solo, refraain en uut. En doar maarkte ik de drummer op. Dee e nou veur t eerst mit of was dat zien menaar van speulen? Wel strak mor veuraal kaalm en in dainst van. ‘Heurst dat wel,’ vruig k aan Henkie, ‘hou dij drummer speult?’ ‘Joa,’ zee e, ‘Boris de Beuker is nait meer.’

In n flits zag ik t weer veur mie: joaren zeuventeg, jeugdsocieteit The Eagle in Baflo. Doar zat e kloar veur de aanval. Boris de Beuker was dij drummer dij vanof de eerste tel der vol ingong, t laifst op 15 trommels en 12 bekkens. Haard, resoluut en veurop. As e der noast zat din zat e der ook echt noast. Elk en ain aan de kaande ik bin der!!! The Eagle schudde van boven tot onder. En dij is der dus nait meer?! Tjonge wat is t leven n stuk beter worden.

Dou mie mor Lielian Tan, drummer bie Erik Harteveld en De Kopstubbers, en de keuningin van de dainstege trommel. Mit n grode glimlach streelt ze mit heur stokken de snaredrum, laifst n beetje aan de ziedkaante. De bastrommel rolt mit en n inkeld moal ruiert ze n pauke. Zai drukt de dynamiek van de blues van Harteveld veuruut, zai moakt de ‘drive’ met bassist Hans Lass en t Hammond örgel van Jan Nieborg. n Betere band veur de aigenzinnege Erik Harteveld kinje nait bedenken.

Muzikoal heb ik weer n beste Dag van de Grunneger Toal had. Aigenzinneg, origineel, n hoge kwaliteit en varioatsie. Mor veuraal rust: gain ego-sologitaristen of snakkerge zangers, wel goie vertolkers van mooie teksten, functionele bassisten, zuvere soamenzang en hail zeker fantastische drummers, dij subtiel t ritme aan de gang huilen. t Is t inde van n trauma want Boris de Beuker is nait meer.

 

Tags: , ,



One Response to ‘Boris de Beuker is nait meer’ column van Eddy de Jonge

  1. Tytsje van der Laan says:

    Prachtig column (!) die bij mij een glimlach teweeg brengt 🙂
    Als groot fan van Krödde doet de recensie mij zéér deugd!!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

tien − vier =

Terug naar boven ↑
  • Literatuur activiteiten

    Geen nieuwe activiteiten