Column Tonko Ufkes, column, goed lek

Gepubliceerd op 8 juni 2015 | door Webloug

0

‘Boeten speulen’ column van Tonko Ufkes

Boeten speulen         

Met n lut groepke stoan we te luustern noar t pianospel, t liekt op Beethoven, mor t stuk zulf ken ik niet. De pianist is n keurege olde man, n ervoaren speuler en zuver klinkt de sonate over t perron. Veul mensen hoasten veurbij, zo as t misschien heurt bij n station, mor wij bennen stoan bleven om n mement echt te luustern.
Noa t slötakkoord stijt e pianist op, boegt eefkes noar ons, pakt zien spullen en lopt vot. De meesten van ons groepke lopen nou deur en ok ik doe mien rugzak op mor zie dan dat mien buurman van zokrekt noar de piano lopt; n vent hielendal ien t swaart met ringen ien beide oren en t hoar recht overènde ien n kleurde hoanekam. As enege van ons groepke blief ik over.
Binnenuut e piano komt e meziek, golft over t perron, zweeft noar boven en komt weerom vanòf de overkapping en mengt doar met weer nije klanken. n Stem, n prachtege tenorstem pakt het over en zingt: “Halleluja, halleluja”, zingt mooier as Leonard Cohen t zulf ooit zingen zel.
Nog aal stoa ik met mien rugzak op, an e grond noageld te luustern, midden ien n hieltied groter wordende groep mensen en om met toe wordt t refrein metzongen en ik kin niet zingen mor ik zing “Halleluja” of mien leven der vanòf haangt.
Ien t lest is de groep om mij toe verdwenen en de swaarte man is niet meer te heuren of te zien. En toch stoa ik nog aal met mien rugzak op en toegelieks golf ik over t perron en zweef laangs de overkapping.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

19 − 15 =

Terug naar boven ↑
  • Literatuur activiteiten

    Geen nieuwe activiteiten