Column Boer, Werkman en t Grunnegs , tonko ufkes, column

Gepubliceerd op 16 april 2015 | door Webloug

0

‘Boer, Werkman en t Grunnegs ‘ column van Tonko Ufkes

Boer, Werkman en t Grunnegs             

“Anno MCMXXIX is deze bundel gedichten gedrukt bij H. N. Werkman te Groningen in een oplaag van 400 exx. waarvan de no’s 1-50 gebonden.” Dizze zin stijt achterien ‘Nunerkes’, de 1e dichtbundel van Jan Boer uut 1929 en der zit n wereld achter dizze zin.

Hendrik Nicolaas Werkman is ien 1882 geboren ien Lains [op t Hogelaand] en we kinnen der vanuut goan dat hij Grunnegs proatte want eileks proatte elkneen ien die tied en ien zo’n dörp Grunnegs. Doar komt nog bij dat zien twee joar jongere bruur Pieter Jacob (1880-1963) drie bundeltjes Grunneger gedichten uutgaf; bv. op Webloug ging t op 26 nov. 2014 over dizze schrievende Pieter Jacob Werkman.

Jan Boer is ien 1899 geboren ien Röppen [op t Hogelaand] en we kennen hum as Grunneger dichter / schriever en ok al woonde er ien 1929 ien Stad, zien eigen toal bleef er altied traauw. Teminnent, as ‘Literaire schrieftoal’ – om dat mor zo te numen. Aans schreef en sprak er hiel voak Hollands, net as n nust Grunneger schrievers ien die tied.

Ien de bundel ‘Nunerkes’ stoan tekeningen van Jan Alting, n kunstenoar die ien 1885 ien Stad geboren wer. Alting waas één van e oprichters van de schildersgroep ‘De Ploeg’, soamen met Johan Dijkstra, (uut Stad) en Jan Wiegers (uut Kommerziel).

Over de toal van ‘De Ploeg’ is niks te vienden en misschien moeten we der van uutgoan dat e leden Hollands met nkander proatten en veur t zulfde deden Alting en Boer dat ok. Jan Boer en Hendrik Werkman kwammen beiden van t Hogelaand, mor ien 1929 woonden ze beiden ien Stad. En al waas heur Grunneger toal host geliek, toch hemmen ze rond t drukken van ‘Nunerkes’ denkelk Hollands met mekoar proat.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

tien + dertien =

Terug naar boven ↑
  • Literatuur activiteiten

    Geen nieuwe activiteiten