Column Christopher Bergmann

Gepubliceerd op 23 augustus 2016 | door Jan Glas

0

‘Boas over aigen toal’ column van Christopher Bergmann

Boas over aigen toal

Dou k lest deur t tekstboukje van n Grunneger spaigelploatje bloaderde, las k even de lieste van mìnsen dij d’artiest dankboar was: pa en moe en zus en zo – t gebrukelke. Tussen femilie en vrunden in kwam k n noam tegen dij k al ais eerder heurd haar: hai haar, ston der, advies geven over t toalgebruuk in de laidjes en de spellen van de teksten noakeken. Ik zag zo’n vermelden veur d’eerste moal. Dou k zuiken ging, von k der nog n poar bie Grunneger artiesten. In t tekstboukje van n Nederlandse, Engelse of Duutse cd kon k mie dat nait goud veurstellen. Dat artiesten hulp kriegen bie van ales en nog wat, doar verboas k mie wis en zeker nait over. Je kinnen ja nait verwachten dat ain dij mooie laidjes schrift, ook nog verstand het van lichtinstalloatsies (veur d’optredens), vörmgeven (veur d’affiches) en marketing (veur de verkoop). Mor je zollen toch denken dat n laidjesschriever temìnzent boas worden kin over zien aigen toal?

Aan d’aine kaande liekt dat meschains gain te hoge verwachten. Joa, ook zangers in aandere toalen loaten heur teksten aan aandern zain en kriegen der kommentaar op. Mor as bieveurbeeld n Engelse singer-songwriter zien teksten veurlegt aan n aander en om opmaarkens vragt, din is dat n dainst onder kollegoa’s. Je stoan op gelieke vout omreden je waiten van nkander dat je de toal aalbaaident even goud proaten. Volgende moal zel d’aander mit d’ain over zien tekst proaten. k Heb t idee dat t net wat aans zit bie t toaladvies doar summege Grunneger artiesten dankboar veur binnen. Adviezen as ‘Most nait vergeten dat geven n alternerend waarkwoord is’ en ‘Haitied aan de gruine volgorde denken, hè?’ zellen doar lichtkans even voak veurkommen as daipgroavendere discussies over zin en vörm. As k zai dat der aal minder mìnsen binnen dij én laidjes in t Grunnegers schrieven én t Grunnegers as moudertoal proaten, begun k mie inains zörgen te moaken over de toustand van t dialect.

Aan d’aandere kaande mouten je ais ale Grunneger spaigelploatjes in n rek zetten dij in de leste pakweg tien joar oetkommen binnen. En din ale ploaten vothoalen van artiesten dij toaladvies kregen hebben. t Rek zel veur haalfschaid leeg wezen; hail wat goie ploaten zollen der nait wezen. Dizze column traauwens ook nait, as t ‘not done’ was om boudel nog even deur ain noakieken te loaten dij opgruid is mit t Grunnegers. En loaten wie nkander nait de gek aanscheren: ook Nederlandse, Duutse en Engelse singer-songwriters binnen wel ais in toeze mit heur aigen moudertoal – al binnen ze doar meschains nait zo openhaarteg over as heur Grunneger kollegoa’s. Grönemeyer bieveurbeeld, dij woont toch al n hail zetje in Londen. Zel zien Duuts der nait onder lieden op n duur? Hou din ook: t zol kinnen dat Grunneger laidjes-moakers voaker verlet hebben om toaladvies. Mor as k zai dát ze in t Grunnegers schrieven, ook al proaten ze t nait as moudertoal, din moak k mie inains nait meer zo veul zörgen over de toustand van t dialect.

Tags: ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

elf + 9 =

Terug naar boven ↑
  • Literatuur activiteiten

    Geen nieuwe activiteiten