Column Tonko Ufkes, column, goed lek

Gepubliceerd op 15 maart 2016 | door Webloug

0

‘Biografie van het Gronings’ column van Tonko Ufkes

Biografie van het Gronings

Op 15 meert komt Siemon Reker zien boek Biografie van het Gronings uut: 1348 bladzieden met n haard kaft, de veurkaant is 17 x 27 centimeter en t kost € 75. Over de ienhold kin t nog niet goan, doarom gijt het hier allent over t boek zulf.
De veurkaant van Biografie van Groningen is 17 bij 27 cm, dat is dus eefkes meer as de 16 moal 24 cm van t Grunneger tiedschrift Toal en Taiken. Ok wat bladzieden aangijt wint Biografie van Toal en Taiken, mor aan dit uutrekenen zitten nogal wat hoaken en ogen; het blift argens appels met peren vergelieken.
De joargaangen 30, 31 en 32 van Toal en Taiken harren elks 384 nummerde bladzieden en e òflopen joargaang 33 (van 2015) har 320 bladzieden; dus soamen 1172. Doar mos 4 moal € 17,50, is totoal € 70,- veur betoald worden. Met aander woorden: 1172 bladzieden Toal enTaiken veur € 70,- tegen 1348 bladzieden Biografie veur € 75,-. Toch, de portokosten zitten bij de pries van n tiedschrift ien, dus ien dit geval 3 joar laang 6 keer en 1 joar 5 keer, moakt 23 moal versturen. Vanzulf moet dit ok metwogen worden.
Wat e pries per bladziede betreft verlust 4 joar Toal en Taiken het van 1 boek Biografie, mor dat komt deur t 23 moal versturen van het tiedschrift, niet deur druk- of loonkosten of zukswat.

Dikte
Biografie is met 1348 n slim dik boek, t is zulfs dikker as t grote woordenboek van Ter Laan, die het 1279 nummerde bladzieden (de 1e herdruk uut 1977). Biebel het n wat aander vörm, mor is het dikste Grunneger boek ooit: 1914 bladzieden. Biografie is wat dikte betreft de nije nummer twee.
Toch kin misschien zeid worden dat Siemon Reker al n dikker boek uutgeven het, teminnent, as we de ienhold van zien beide cassettes Goud Volk, soamensteld ien 2008 en 2010 bij nkander optellen: totoal 10 boeken, soamen 2.380 bladzieden.
Reker en zien uutgever In Boekvorm holden ien elks geval van steveg waark en dat valt op: Goud Volk en Biografie is ien 8 joar tied goed veur roem 3.700 bladzieden. Dat is veul, zeker as we dat getal vergelieken met e rest van e Grunneger schrieverij, want t lukt n dichter of schriever mor amper om n bundeltje uut te brengen.
Bliekboar is der de òflopen 8 joar meer verlet om t waark van Siemon Reker as om t literaire waark van alle Grunneger dichters en schrievers soamen.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

13 − zes =

Terug naar boven ↑
  • Literatuur activiteiten

    Geen nieuwe activiteiten