Literatuur

Gepubliceerd op 29 oktober 2014 | door Webloug

0

BGTC over ‘vlees’ of ‘vlaais’ en Jan Glas over ‘eeuw’ en ‘aiw’

BGTC het via Vroag&Antwoord keken welke Grunnegers ‘vlees’ zeggen en wel heur van ‘vlaais’ bedainen. Bie mie thoes wer der ‘vlees’ zegd en k lees ien de column van Eline Brontsema dat dat doodnormoal is veur n Hogelandster. Nou, gelukkeg, want dou ik joaren leden begon te schrieven ien t Grunnegs, en mie dus verdaipen mos ien mien toal, las ik overaal ‘vlaais’ en binnen je al gaauw schietensbenaauwd dat je vernederlandst Grunnegs schrieven mit joen ‘vlees’.
Zo kwam der lest n vraauw op mie òf, ain menuut veurdat ik aargens gedichten veurlezen mos: ‘Doe schrifst gain goud Hogelandsters, overaal staait ‘de’ en ‘het’ ien dien gedichten en dat doun wie Hogelandsters nait.’

Bie Peter Visser kwam ik veur t eerst t woord ‘laiw’ tegen ien de titel van zien prachtege eassaybundel ‘Laiw op n dampoal’ en begon t grode twieveln weer; k zeg al mien haile leven t nederlandsachtege ‘leeuw’ en ‘eeuw’. Eeuw-oetgaang oetsproken as ‘aiw’ dus, deur Visser, ook n Hogelandster. Ien zo’n geval belde ik mien moe, dou dij nog leefde, en vroug heur om zunder noa te denken ‘Ik ben in de 19e eeuw geboren’ te vertoalen ien t Grunnegs. ‘Ik bin ien de 19e eeuw geboren,’ zee mien moe vot. ‘Joe zeggen nait ‘aiw’? ‘Aiw?’ vroug mien moe. ‘Joa, aiw.’ ‘Wat n roar woord,’ zee ze, ‘heb k nog nooit zegd, kin t nait ains zeggen, ligt mie maal ien mond.’ ‘Peter Visser schrift aans wel ‘aiw’ en ‘laiw’ en dij komt net as joe van Mij,’ perbaaierde ik nog. ‘Dat zel wel, ik heb der ien elks gevaal nog nooit van heurd,’ kreeg ik weerom. ‘Hou is t verder?’

Jan Glas

Tags: , , , , , , ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten