Column

Gepubliceerd op 4 maart 2015 | door Webloug

2

‘Bewonderoars’ column van Aly Freije

Bewonderoars

Joaren leden heb ik mie ains in n boutiek n laange mantel aanschaft mit haile braide scholdervullens. t Was van n wollen stof in n subtiel pied de poule roetje in n veujoarsgruine kleur. n Mooie, sjieke jaas, priezeg ook.

Mensen keken dervan op as ik langskwam. Joa, der waren wel opmaarkens as, ‘hest n kapstop inslikt,’ en ‘zit der n bezemsteel in dij jaas,’ en ‘woar mot dat hen wicht, mit zukke braide scholders.’ Moar ik vuilde mie fier en apaart. t Was nog veur scholdervullens bie vraauwen mode werden.

t Was vast ook n reaktie op pesterijen, vrouger op t schoolplaain, dou ik veur t eerst n wollen strakke broek aan har, mit grode gruine en gele Schotse roeten. Mien moeder har t kunsteg naaid, in n tied dat aander kinder nog in donkerblaauwe lompe trainingsbroeken luipen.

n Tiedje leden wer ik aansproken op n aander jaske van swaart stuutsikoorn stof, dou ik bie Hornbach de winkel oet kwam. n Man ruip mie noa, ‘joe zain der mooi oet en wat n schier jaske.’ En doar kwam hai al vanachter de toonbaank van zien haringkroam op mie òf. En wie hadden n aangenoam gesprek. Hai har laang zöcht noar zo’n jaske, windvast en lekker waarm tussen de vissen in zien kroam. Zien pabbe har ook aaltied n stuutsikoorn pak aan as schipper. Ik vertelde dat dit n klettervest was en dat mien voader dat druig in t waark as boer en dat ik doarom ook… mor hai pruit alweer deur, bewonderde de gespjes en de zakken en vruig woar ik t kocht har. Ik vertelde hom over t Vakkledinghuis in d’Olle Ebbingestroat, n schiere winkel mit n man dij alles van manchester wos en de waarkers dij t druigen. Van de vleug dij noar beneden lopen mout en dat t woater nait in de zakjes komt mit dij slimme leren sloetens.

n Week derveur har ik ook al n bewonderoar had, bedocht ik mie nou. n Man op n ledder ruip mie noa en floot der bie, moar ik luip stoensk deur. Zuks geroup en gefluit, doar waren wie as feministes ja aaltied fel op tegen.

Mor t was vast om mien jaske west, want woarom zol hai aans zo roupen hebben?

 

Tags: ,



2 Responses to ‘Bewonderoars’ column van Aly Freije

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

een × 1 =

Terug naar boven ↑
  • Literatuur activiteiten

    Geen nieuwe activiteiten