Column henk puister, column

Gepubliceerd op 11 februari 2016 | door Webloug

2

‘Bestoan ie nog?’ column van Henk Puister

Bestoan ie nog?

‘Ha,’ groet n man mit n vlassnorrechie en n brille op. Vervolgens nuimt e mien noam, mit n vroagtaiken der achter.
‘Klopt,’ geef k hom mit. ‘Zo hait ik.’ k Stoa op punt n tiedschrift deur glieve te steken in flat woar n kellegoaschriefster woont mit heur man.
‘Hou gaait t mit de meziek,’ vragt e. ‘Ie binnen van de meziek toch?’
‘Joa. Ik bin van de meziek. Ie ook?’
‘Zeker,’ is t antwoord. ‘Ale doagen.’
Man het n zaachte stim. ‘Zeg, bestoan ie nog. k Heur nooit meer wat van joe.’
k Glimlaag van: ‘Joa, hur. Ik bestoa nog. k Goa aal deur. Net as ie.’ Zunder gedachten bie wat k dou loat k tiedschrift deur glieve glieden.
Man moakt gain aanstalten om mit lift noar boven te goan. t Liekt of staait e in twijstried. ‘Ie hebben lest optreden in hervörmde kerke van Kropswolle. Dat heb k in kraande lezen. Mor dat was nait mit joen texmexgroep. Ie binnen ook ja dirigent van Neptunus. Accordeonorkest. Wat veur soort wui doar speuld den?’
‘Och, bekinde stukken uut musicals. Van George Gershwin. Wat van Sinatra. n Walsje, n taangootje.’
‘Hail aanswat as texmex, heur ik wel. Was der n beetje volk in kerke?’
‘Wel n beetje meer as n beetje,’ vertel ik hom. ‘Laifhebbers, hè.’
‘n Accordeon is n meroakel mooi instermint,’ maint de man. ‘Mainste minsen waiten nait wast der aal uuthoalen kinst. Jammer. Dij denken dast der allain op daansen most bie bruloften en pertijen. Mor dat huft nait.’
‘Nee,’ zeg ik. ‘Dat mout elk zulf waiten, of e daansen wil of nait.’
‘Flaco Jiminez is n monster texmexaccordeonist. Zunde dat e zo zopt. Vingervlugge vogel. Wordt al n krom, ol kereltje. Aaltied n lach op t gezichte, hè, dij Flaco…’
‘…Flaco Kwakko,’ zeg k in miezulf…’
‘…Aaltied n lach…’ heur k hom veur twijde moal zeggen. Nou tot kiek, hè. k Hoop dat ie nog ais mit wat nijs komen.’
‘k Dou mien best,’ beloof ik hom. Binnenkört zel mien volle meziekneef – en noamgenoot in Stad mie wel weer vertellen dat hai aansproken is op n stukkie dij ik in kraande schreef. Zo gaait dat noamelk al veule joaren laank bie ons baaident.

Tags: ,



2 Responses to ‘Bestoan ie nog?’ column van Henk Puister

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

19 + negentien =

Terug naar boven ↑
  • Literatuur activiteiten

    Geen nieuwe activiteiten