Column Henk Scholte column

Gepubliceerd op 6 april 2016 | door Jan Glas

0

‘Beschonen’ column van Henk Scholte

Beschonen

Geregeld lees ik in de kraande dat t der goud veurstaait mit de Graauwe Kiekendieven in t Oldambt. Dat is mit dizze roofpaiten, dij aaltied slim verlet om moezen hebben ook wel ais aans west. t Grode perfiet veur dizze joagers stekt dudelk in de grode lappen broakliggende kaampen laand en dat trekt as vanzulf ook weer de neudege knoagers aan. Om dit te realizaaieren kregen boeren doar toudestieds in de veurege aiw via Europa ook nog goud cinterij veur.

Lestdoags zat k in Finnerwol op n lije veurjoarsoavend midden in t veld op n terras te proaten mit aine dij hier goud kiek op har. Hai was ook aine van t boerenbedrief en wie keken al proatend over dij grode wiede vlakte bie hom aan veurdeure. De toumoakte grond lag der haile best bie. t Was aalmoal waaite wat t veld in de loade veurjoarszun zo mooi gruinde. Hai vertelde mie lopiesweg hou t der mit de Kiekendieven nou veurston en wees mie op n lichte verhogen in dat wiedse vlakke laand. Hai zee mie, dat doar n strebe luzerne en wilde bloumpiezoad uutzaaid was en dat t aalmoal bedould was om de natuur te beschonen. Beschonen? Wat mainen ie doar din mit. Wie hebben van t Waddenfonds extroa steun kregen om wat te doun veur t netuurbehold en t in stand holden van t biotoop veur de Graauwe Kiekendieven. Wie hebben de waaite dij der al inzat doarveur weer omplougd en ofvlakt en der n moesvrundelke zoadmengsel mit n luzerne raande vannijs inzaaid en zo beschonen wie op dizze menaaier zotrekend onze natuur. En zoas dat gaait in menneg gesprek gaait t zo mor weer van t ain op d’aander. d’Uutdrukken beschonen van de natuur bleef mie noatied wel deur de kop zweven. Zo stoef bie de grup kwam bie mie wel de gedachte op dat t wel ais van Duutse komòf wezen kon, want doar bedudt Schonung ook beschaarmen. Ik was hier zulf in t Grunnegs nait bekìnd mit.

Thuuskommen heb k de dikke Ter Loan der op noakeken en dij geft allain mor as betaikenis: zindelk, schier holden. Is der vandoag de dag din n verschoeven in betaikenis? Bie t verder spitten kwam ik aargenswoar in d’Veenkolonioale n stukkie tegen van de Knoalster schriever Deelman. Hai schreef t volgende over beschonen. “ik har n verkeerd medisien innomen en dou har k inainen slim last van stainzwellen. Ik vruig dou aan n oldere doame hou nuimen ie dizze monsters. Zai bedocht zuk evenpies en zee dou: “Dat binnen ja gain stainzwellen, dat binnen bloudvinnen!” En doarnoa, met n dikke gnivvvel: “Doar mag je aans wel bliede mit wezen. Zo komt ’t kwoad der uut!” “’t Kwoad?” vruig ik. “Joa. Leuf mor driest, dit beschoont joe n zaikte. Bin je der ook beroerd van; koorzeg?” Nee, koorzeg was k der nait van, mor toch wel wat flaauw. “Gain wonder”, zee ’t ol mins, “’t beschoont joe wel n zaikte, moar zukswat onderholt joe ook”. t Is mor net hou je t bekieken, ook veraanderns heuren bie n beschonende gedachte.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

5 × 4 =

Terug naar boven ↑
  • Literatuur activiteiten

    Geen nieuwe activiteiten