Column Jan de Jong, column

Gepubliceerd op 2 maart 2015 | door Webloug

0

‘Bekenden’ column van Jan de Jong

Bekenden

Doodschoten! Vraauw wist noar n widde tìnt achter linten veur n hoes ien n rijtje. Hier bie ons ien stroat. Zo dichtbie.

Kikt nog n vraauw ien camera. Hai zee haitied goidag. Gain mins haar last van hom. Zukke oarege minsen.

Nee, zegt aander vraauw. En ie zagen hom nait veul. Dij aarme vraauw en leutje kiender. Twij binnen der, nait?

Joa, twij. n Laive vraauw. Aal doag brocht zai heur ien auto noar schoul. Ie zagen heur aans nooit. Aarme kiender. Gain pabbe meer.

n Man mit fiets zet bain aan grond. Ik schrok mie dood vanmörn. Twij moal n riedel wer der schoten. En n auto mit dik keboal naaide der oet. Even veur vaaier. Geliek apmoal plietsie. Of zai der op wacht haren.

Blift n ol man stoan. Mit n leutje hondje. Aigen schuld.

Man mit fiets gaait op stang zitten. Tied dat n fersounlek mins op ber ligt en nait bie stroat lopt.

Hai kwam mit auto thoes hur, zegt n vraauw.

Joa, twij van dij dure autos. Nait waarken, aal boudel ien hoes potdicht, ook aan achterkaant. En n vraauw dij allinneg noar tegels kikt as zai hoes oet runt noar auto of weerom.

t Hondje kikt boas aan en gaait ter bie zitten.
En mor laggen en nikken. Ol boas het gain meedlieden.

Man van t nijs zegt dat t n bekende van plietsie is.

Veurlichtster van plietsie zegt dat n bekende van plietsie is. Meer kin zai nait zeggen. t Onderzuik lopt.

Ik kom in t inne en schenk vraauw en mie kovvie ien. Dou t licht achter boven grode toavel aan en pak n schriefblok. Din druk ik tillevisie oet. Vraauw dut wenkbraauwen omhoog.

Buurt mor ais bielaangs, nait?

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

17 − twee =

Terug naar boven ↑
  • Literatuur activiteiten

    Geen nieuwe activiteiten