Column Jan de Jong, column

Gepubliceerd op 11 november 2016 | door Webloug

0

‘Beeldenstörm’ column van Jan de Jong

Beeldenstörm

Dou k bienoa zeuven was kon mien pa hom verbedern.
En wie, mozzen verhoezen.
Op t nije dörp mos k dij eerste dag votdoadelk om bosschop.
‘Woar bistoe ain van,’ vroug vraauw achter teunbaank bie slachter, noadat áál vraauwlu aan beurt west wazzen.
Ik langde heur t knipke mit braifke en sinten.
‘De Jong.’
‘Wat dùt dien pa din. Dij kinnen wie ja nait. Binnen ie van ons kerk?’
Ik wait t nait.

n Dörp mit vief kerken.
Allinneg openboaren haren gain kerk.
Was gain Hervörmde schoul, ik mos noar Griffemeerde. Jonges en wichter begrepen dat nait.
Ik heurde naarns bie.
Allinneg bie t vechten tegen openboaren en roomsen mos k mitdoun.
Vrijgemoakten wazzen dikke baangeschieterds en gingen veurtied al aan loop. Mit stokken,
swoarden, speren, beschaarmd deur ol deksels en potdeksels haauwden wie nkander kop
stukkend.

n Wereld en n dörp verdaild in goien en slechten.

Ons laand het n christelke traditie lees ik vandoag.
Gelukkeg binnen zai der nog.
n Partij* dij godsdainstvrijhaid van aandern ien weeg zit.
t Geleuf, dij zuk cultureel oet deur biedroagen aan: “gevoelens van vervreemding en van
aantasting van de historische Nederlandse identiteit”, dat kin vanzulf nait.
Roupen van, dat heur god de grootste is, dat ter gain aander is, dat hai de ainege echte is?
Hou duren zai.

Wie maggen bliede weden dat jongen van tegenswoordeg Ipads, tablets, Iphones, kompjoeters en wat aal nait hebben.
Scheelt n hail ènde aan stukkende koppen.

En joa, ik wait t wel. t Laifst nait over poletiek en geleuf schrieven. En vanzulf ook nait over swaarde Pieten. Nait altied handeg.

Bron: https://www.sgp.nl/actueel/sgp-geen-gebedsoproep-meer-vanaf-moskee/5379

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

8 + 2 =

Terug naar boven ↑
  • Literatuur activiteiten

    Geen nieuwe activiteiten