Column Jan de Jong, column

Gepubliceerd op 20 mei 2015 | door Webloug

0

‘Baisten’ column van Jan de Jong

Baisten

Ik rem, smiet fiets tegen boom en griep hond oet zien bakje.

Ligt n kraai op zied. Bie viever. Hai trilt aalderwegens.
n Toezeboudel van visdroad. n Wotterg oogje glopt mie schaif aan. Ik pak mès oet buus. Hond gaait ter veur zitten.

Wiebelnd komt e ien t inne en zakt deur poten. Kikt mie aan.
Ik striek hom over veren. ‘Dou mor kaalm aan òl.’

Òl swartrok. Wie kinnen nkander. Van aal doag bie vievers strunen. Baaident op zuik. Noar aal dat leeft.

Stopt n man. ‘Nek omdraaien!’
Mit laange sloagen vlugt e noar zien boom.
Man wist op veurheufd.

‘Mien pa het t oksternust oethoald. Hai het heur apmoal doodhaauwen.’ Jong gniflaagde noar mie. ‘Ain is t gruinlaand ien flotterd.’
n Mirreg mit veul fouten ien sommen. Votdoadelk noa schoultied overaal en stevels aan.
Daip ien onderwaal zat e te bibbern en bedelde zachtjes. Naarns gain òllen.

‘Ekkie’ vrat as n slootgroaver. Universeelvoer mit stukken wurms. Wat loater ook slovve kattebrokjes.
n Roem hok achter t hoes op toen. Haitied mit t deurtje lös.
Doar k mor noar tou ging, hai mòs en zòl mit.

n Roege haarstdag, op toen bie t spoor raipen z’hom. Hai vloog geliek noar mie tou en keek mie aan. Stil zaten wie op kaant. Ik streek hom over veren. Dou gaf k hom zegen.

Ain moal heb k hom weer zain. n Joar loater. Op toen bie t spoor. Wie bleven hail mirreg.

Hou n baarg minsen mit daaier omgoan prakkezaaier ik. Onze beschoaving.

Onderwegens zet ik n bain aan grond en kiek over t laand. Netuur. Dóar ie mor kieken.
Gaanzen. Van van t veujoar. As dikke poaskukens rolden zai dou op rieg achter heur moeke aan. En nou heur eerste ru. Jonkhaid ofschudden. Raaisveerdeg moaken.
Aalgedureg flappern vleugels. Hier en doar strekt n haals. Dapper stapt onschuld rond en holdt ollu stief ien goaten.

Op stroat, bie n vring mit ‘Natuurgebied’ stopt n vrachtwoagen mit n grode container en wat luxe woagens. Kovverbakken goan lös.
Zai swaaien braidoet mit aarms en wiezen mit stokken. Din verspraaiden zai heur. Boetendsten lopen vast veuroet.
Ain blift achter en legt slangen oet.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

7 + zeventien =

Terug naar boven ↑
  • Literatuur activiteiten

    Geen nieuwe activiteiten