Muziek

Gepubliceerd op 12 maart 2013 | door Webloug

0

Arnold Veeman op Dag van de Grunneger Toal

Op Dag van de Grunneger Toal, zodderdag 16 meert, zel Arnold Veeman optreden om 11:45 uur.

Componist, zanger en muzikant Arnold Veeman (Stad, 1973) brengt zien kinderjoaren deur in Pieterzijl en loater in Fraisland. Pas in zien pubertijd leert hai Grunnen echt kennen as hai verhoest noar t Hogeland, noar zien moeke in Pieterburen. Dij regio is hai sinds dou altied trouw bleven en hai woont sinds n poar joar in Kloosterburen.

Arnold beweegt hom in veul muziekgenres. Hai het conservatorium deurlopen en speult contrabas, gitaar, drums en andere instrumenten. Zo waarkt hai soamen mit verschillende symfonieorkesten en het hai les geven aan de Academie veur Popcultuur in Leeuwarden. Inmiddels het Arnold n braid muzikoal oeuvre op zien noam stoan: van filmmuziek tot Grunneger ballades, van aigentiedse autonome muziek tot symfonische composities dij ook internationoal oetvoerd binnen.

t Gevuil veur Grunnen en de streektoalmuziek is bie Arnold daip worteld. Mit zien band The Yellowish Summer Evening wint Arnold in 2002 t Goudzuiken Concours in Stad en zien laid Mien Lutje Laif, n vertoalen van Mon Cher Petit deur Jan Siebo Uffen, wordt in 2004 n regionoale hit. Der volgt n dubbel-cd titeld Contrast,  mit n Grunnegstoalege en n Engelse cd. Soamen mit tekstschriever Jan Siebo wint Arnold mit t nummer Nekstoe mie in dat joar de eerste pries in t  Streektaal project van t Noord Nederlands Orkest. Arnold componeert in 2009 de muziek veur t Oldambster volkslaid. De tweede cd Eerappelbloud is ook in soamenwaarken mit Jan Siebo Uffen tot stand kommen. In 2012 verschient de verzoamel-cd Toukomst, in t joar dat ook de documentaire Mijn Broer Arnold over Arnolds zuiktocht noar zien muzikoale wortels in Suriname oetkomt.

Tiedens de Dag van de Grunneger toal treedt Arnold Veeman op mit multi-instrumentalist Bert Ridderbos. Arnold het Bert, eerder bekend van de folkgroep Törf, kennen leerd tiedens zien optreden bie de Linde Nijland sings Sandy Denny tour deur Duutsland en Nederland. t Is al laank n wens van Arnold om soamen mit Bert te musiceren in de mainst essentiële vörm. Zunder toeters en bellen. Op zotterdag 16 meert gaat t din indelk gebeuren.

Arnold zien film Mijn broer Arnold zel ook vertoond worden tiedens de Dag van de Grunneger toal.

Website Arnold Veeman

Haile pergram van Dag van de Grunnegr Toal

(Foto: Marij Kloosterhof)

Tags: ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten