Column Jan de Jong, column

Gepubliceerd op 19 augustus 2015 | door Webloug

0

‘Angst’ column van Jan de jong

Angst

Stoaren.
n Toezeboudel ien kop.
Ik pak kraant nog mor ais.

Eerabbels en petat worden duur. Aal dreugte. En Hollandse lingerie ien Amerikoanse handen.

Darmoperoatsies loater, en veurrang darmkanker.
Hè.
Wat maal.

‘Ik vertel u ook nog even de risico’s. Niet om u bang te maken.’ Chirurg pakte n pen en n stuk pepier.
‘Een stuk darm ertussenuit en het gebied met uitzaaiingen van de darm naar de aorta. Ik maak u open van het borstbeen tot het schaambeen.’
t Was dudelk. En ik nait geruster.
‘Ik ga er vanuit dat het wel goed zal gaan.’ Hai keek mie ais goud aan.

k Heb leste weken nog wat kluskes doan. k Denk nait dat t aans nog wat wordt veur van t winter.

En ik mout ter op reken dat k din nog zeuven tot tien doag blieven mout.

As t mor gain stoma wordt.

Kanker het stuur overnomen. k Bin gain boas meer over mien aigen lief. Hai moakt oet doar raais hìn gaait. n Zaikmoakende raais.
Nait zaik van kanker mor van biewaarkens en noawaarken chemo en meedzienen. t Kin wel n joar duren, zee internist.

En no dij operoatsie nog.
En t rezeltoat? Doar woar t om gaait?
Gain garanties.

k Heb best wel vertraauw ien chirurg en zien ploug.

Din femilie nog. k Hol reken mit heur. Ongewild nemen zai dail aan dizze raais. Kriegen t dubbelop veur de koezen. Stoer.
Ook al vaalt mie niks aan te reken.

Was t mor vrijdag de 21e. Dit heb k nog nooit eerder, zoas ook bie aander swoare operoatsies had. t Vuilt aans. t Mement, as dat t veurbie is zel wel wezen as k op operoatsietoavel kropen bin, time out (check van chirurg) had heb en anesthesist mie narcose geft.
Toch wel makkelk as ie t wat voaker mitmoakt hebben.

Jan Wierengoa staait n ogenblik te krinkjespijen en te kwakken mit ain bie Tichelwaarkbrug over Auwerderdaip. k Lees hom geern.

Ik zel, zo t rekend, wel eefkes n zetje oet de lucht wezen.
Al nem k leutje laptop wel mit.
Veur onderwegens.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

1 × drie =

Terug naar boven ↑
  • Literatuur activiteiten

    Geen nieuwe activiteiten