Column Tonko Ufkes, column, goed lek

Gepubliceerd op 29 mei 2015 | door Webloug

0

‘Alles wieten’ column van Tonko Ufkes

Alles wieten

Vanòf t strandje van Rötmeroog goa ik noa de Wadlooptocht as leste an boord van het schip. Eerst loop k bij mien kollega-gidsen laangs om tegen elks nog n poar woorden te zeggen; n grapke, n bedankje. Dan zit mien toak der op en ik zuuk n rusteg plakje aan dek om alvast t logboek op te moaken.
‘Meneer de hoofdgids, mag ik wat vroagen?’
Eén van e deelnemmers stijt veur me, n forse man, denkelk de oldste van n femilie die vandoag metliep. Onderweegs mos k hum eefkes terecht wiezen toen er rommel votwaaien liet.
‘Ja hur, vroag gerust.’ n Hoofdgids moet per slöt veural regeln en toegelieks n goed gastheer weden.
‘Is dat Wadlopen niet gevoarlek, hemmen joe wel es wat slims metmoakt?’ De man schoeft n stoel dichterbij en gijt der goed veur zitten.
‘Nee,’ zeg ik noar woarheid, ‘Wadlopen is n veilege sport en ien roem vieftien joar heb ik nog nooit reanimeerd, zulfs gieneens de EHBO-tas bruukt.’
‘Mor t weer,’ holdt er aan, ’t weer zit toch geregeld tegen. Haarde wiend, regen, of aans felle zun.’
Ik blief hum teleurstellen en leg uut dat we bij mal weer, zulfs al bij slechte veuruutzichten niet op pad goan.
’t Kin toch onderweegs ok omsloan?’ Hij schoeft zien stoel wat dichterbij, vuult dat er ien e buurt komt van woar er weden wil.
‘Dat klopt, enkel slagt het weer om, verleden joar kwam e steert van mien groep ien n onweersbui te laande.’
‘Ah, en warren die mensen toen benaauwd?’
‘Nee, gelukkeg niet. Ze bleven goed noar ons luustern en der waas gien paniek.’
‘En joe, warren joe benaauwd?’ Hoopvol kikt er me aan.
‘Ja, ik waas wel benaauwd.’
‘Oh’ fluustert hij en lijt zien haand op mien aarm, ‘de aandern warren niet baang en joe wel?’
‘Ja’ zeg ik en kiek hum recht aan, ‘ik wel.’
‘Mor eh, woarom warren joe dan wel baang?’ Verboasd holdt de man nog hieltied mien aarm beet.
‘Omdat ik wis wat gebeuren kon.’

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

10 + tien =

Terug naar boven ↑
  • Literatuur activiteiten

    Geen nieuwe activiteiten