Column henk puister, column

Gepubliceerd op 13 augustus 2015 | door Webloug

0

‘Alderiezelkst mooi’ column van Henk Puister

Alderiezelkst mooi

Smoesderg weer. Renneke en Strik hebben middagpauze. Zai kikt noar Striks wit overhemd mit laange maauwen en noar zien strikke. Zulf dragt ze n zummerbloesie mit bloumpies. Widde broek. Kört, blond kapsel. Ze vriemelt aan heur hoar. Ze zwiegen achter heur kop kovvie op terrastoavel.

‘Nait drok in Stad,’ zegt Renneke.

‘Vekaansietied,’antwoordt Strik. Schier feguurtje. Hai glopt over linkerscholder noar kellegoa. Oardeg wicht. Moderne opvattens. Kinst mit aankomen. Hai vrift over welvoartsbobbel van zien lief.

‘Over vattien doage vertrekst?’

‘Joa,’ zegt Renneke. ‘Wait nog nait woarhèn. Vèr laand. Beetje kultuur snoeven. Leren van aander volk, heur gebruken, heur gewoontes. Intersant.’

‘Hest al ketakt mit dij Turken noast die?’

‘Buren? Waaineg. Zain mekoar hoast nait,’ vertelt Renneke.

‘Intersant,’ vindt Strik…’Joa, hur… Doar hest hom: Knuvvelbere.’

‘Doan mit rust,’ mommelt Renneke. ‘Knuvvel het in elks gevaal n vris kapsel. Zien stiekeltjes valen wel op.’

‘Dat is den ook t ainegste vrizze aan hom,’ schampert Strik.

‘Och, hai bedoult t nait slecht,’ zegt ze. ‘As e mor nait aan mie zit te fleren en te gleren. Hol k nait van.’

Knuvvelbere zet plestik pude op grond hèn. ‘Dag, minsen. Inkopen doan.’ Hai schoft aan, hoalt Dagblad tou boordevolle puut uut en bloadert. ‘Plietsie krigt der geld bie. Was veul om te doun. t Mag van mie. Moatschoppij wordt aal gewelddoadeger, is stokverröt. k Stoa nait groag in plietsieschounen. Staaist aaltied bloot aan kritiek. Plietsie kin t nooit goud doun. Zedenzoaken. Pokkelvol waark. Ondaankboarhaid troef. Mouten veul meer plietsies komen. Veur touzicht, hè.’

‘Mainst dat?’ vragt Renneke. ‘Bist toch zo veur vrijhaid?’

‘Tot zo wied,’ is t antwoord. Knuvvelbeertje gaait stoan, stekt voesten omhoog: ‘Leve vrijhaid!’ Hai pakt Strik bie bore van bezoen, ropt aan zien strikke. ‘Dou òf dat ding! Hai knelt ja, man. Ons Keunelke Hooghaid Prins Claus gaf t goie veurbeeld al.’

‘Onwieze,’ scheldt Strik en weert hom òf.

‘Gelukkeg, komt n beetje wind,’ zucht Knuvvelbeertje as e zok op stoule zakken let. ‘k Wol dat k n rokje aanhaar. Lekker luchteg.’ Mit legt e haand op bovenbain van Renneke heur laange broek. Even let e haand liggen.

‘Doe, doe… Onverbeterleke…’, foetert ze en slagt hom mit kraande om d’oren. Hels in hakken boundert ze vot. Knuvveltje schudkopt, kikt heur noa: ‘Wat is ze toch alderiezelkst mooi, hè, as ze kwoad is. Of dut asof.’

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

20 − drie =

Terug naar boven ↑
  • Literatuur activiteiten

    Geen nieuwe activiteiten