Column column jan glas

Gepubliceerd op 7 juni 2015 | door Jan Glas

0

‘Ain bain’ column van Jan Glas

Ain bain

Wie, mien zus en ik, huren n appartement ien Montmartre, n leventege wiek ien Paries. t Appartement is boven n bakkerij, boulangerie hait dat hier. Zodderdagnaacht om twij uur bin ik nog wakker en heur t geschoef van bakloaden ien en oet de ovens en deur t open roam komt roek van vers brood koamer ien. Zo vro begunnen bakkers deur de week nait. Ik denk dat ze zundag net noa middernaacht ien t veuren begunnen te bakken, din binnen ze zundag overdag vrij. Om haalf tien volgende mörn mot ik ien rieg aansluten veur brood. Haile buurt hoalt brood. Bakkerij het n pries wonnen, staait te lezen op winkeldeur: beste bakker van Isle de Paris. Mor mien zus is nait onder iendruk: deeg is te snel bakt en te waarm sneden, woardeur der apmoal goaten ien t brood zitten en plakken aan nkander bakken, t brood is ook nog ais binnen n dag dreug en toai.

Wie kieken oet op n groot, hoog, witgekaalkt pand, typisch Frans, mit apmoal loeken. Ons hoes het ook loeken en ik mag geern vanoet dat romantisch roam op twijde verdaipen wat op stroat kieken. Net heurde ik n wicht kwoad roupen dat ze gain ‘putain’ is. Ik leg t bouk ‘Een calculerende terriër’ van Frans Haks even weg en loop noar t roam. n Jong wordt flink de woarhaid zegd, hai kikt aal wat noar beneden en zegt niks terug. Hai is te ver goan, dat is zo kloar as wat. Noa n haile preek lopt t wicht mit stieve kuten vot. Hai wacht even, checkt snel zien smart-phone, din lopt e zo’n twinneg meter achter heur, stroat oet. Woarschienlek oetlopend op n potje goudmoakseks. Voak wel goie seks. n Beetje n lam gevuil doarnoa, want der is mainsttied niks oetproat of veranderd. t Onofwendboar ind hangt al ien lucht. Dat vuilen baaident.

Vanmirreg zag ik n bloudmooie vìnt mit ain bain, n hail mooi bain. Hai haar n korde boksum aan en ston tegenover mie op krukken op greun licht te wachten. Oet ain van de piepen stak dat aine bain, n mooi broen, gespierd, eksemploar. Wat is der mit dat andere prachtege bain gebeurd, docht ik. Even docht ik aan Godfried Bomans.

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

zes − 2 =

Terug naar boven ↑
  • Literatuur activiteiten

    Geen nieuwe activiteiten