Column Chris Kiel, column

Gepubliceerd op 14 april 2015 | door Webloug

0

‘Ai’ column van Chris Kiel

Ai

Op Dag van de Grunneger Toal kregen we n schat n van n koartje. Ston Laiverd op.
Of t doar van komt, k wait t nait, mor ik aarger mie leste tied voak aan zo’n soort ai as in Laiverd.
Bespottelk vanzulf, want bie laiverd, laif, laifde, verlaifd, gaait t om hail wat anders as zo’n klank/lettercombinoatsie.
Toch zeg ik voak ‘Ai!’ as ik dij ai tegenkom.
Dij ‘Ai!’ komt der oet bie n – fysiek of psychisch- pienleke gewoarworden, zegt van Dale. En, mag mie de bok steuten (Ai!), mor soms, as ik dij Grunneger ai stoan zai, gaait t mis en as k t heur is t mainsttied nog slimmer.

Bie laiverd heb k gain last. Ik zing dus mor zo oet volle borst dat nummer van Jannie Stalknecht (veur t jonkvolk: Laiverd kom weer bie mie). Al het mien vraauw, hail gek, doar juust weer muite mit. Misschien ook nait zo gek, ik bin Caruso nait. Loat stoan Jannie Stalknecht.
Bie laif ligt t ingewikkeld. As Arnold Veeman ‘Mien lutje laif’ van Jan Siebo Uffen zingt, bin ik in harmonie mit t haile heelal (hailal? ‘Ai!!’). Binnen n poar vraauwlu, mainst gounent dij t Grönnegs nait as kind leerd hebben, dij t ook zeggen kennen zunder dat k last heb, mor dij zeggen nait de oi-klank dij we doar wend binnen, ze begunnen echt mit n ‘a’(spellingoetsproak?). Ze doun t nait, mor ze zollen mie ‘heur laif’ nuimen meugen (as k dat was).
Verder kennen ale vrouwlu tegen mie zeggen ‘Dat vin k laif van die’(ook mit n ‘o’), mor as kerels dat doun zollen: ’Ai!’
Nou hebben we nog aine over. Verlaifd. Dij ai smaart. Altied.

Joaren leden zee n schat van n vraauw (mor nait mien laiverd) tegen mie dat n gezoamelke kennis weer verlaifd worden was op de vraauw woar e van schaaiden was. t Is mor n ogenblik, mor t is altied even ‘Ai!’ as k heur tegenkom. Doarnoa is t contact gelukkeg hail goud, en bie dij kennis is t der ook nait mis deur goan.

Tags: , ,



Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

twaalf − 6 =

Terug naar boven ↑
  • Literatuur activiteiten

    Geen nieuwe activiteiten