Column column jan glas

Gepubliceerd op 8 februari 2015 | door Jan Glas

0

‘Aarfgoud’ column van Jan Glas

Aarfgoud

‘Even n versnellen hoger,’ heur ik as k vanof Zuderdaip slichte drumpel van Pelsterstroat neem. n Man van aargens ien de zeuventeg komt noast mie rieden. k Heb der gain versnellen op,’ zeg ik, ‘olle fiets van mien pa… hai is zulf al joaren dood.’ k Zet nog wat meer kracht op trappers, want ik bin wel even minstens 15 joar jonger, k loat mie deur zo’n oldje echt nait ienhoalen. ‘Wat schier dat ie der nou op fietsen,’ zegt man nog. ‘Union Vederlicht,’ roup ik noar achtern, ‘en swoar dat e is!’

k Heb fiets van mien pa nou meer as twinneg joar. Twaalf joar leden is e oet tied kommen mor al veul eerder kon e bain nait meer over stang kriegen en kocht e hom n doamesmodel. Ik kreeg de gestangde fiets. k Vertel te pas en te onpas dat ik op mien pa zien olle fiets rie. Veul reaksie krieg k der mainsttied nait op. Omdat ik t zulf biezunder vien, main ik dat andern t ook hail wat vienden monnen. t Is veuraal dat ik t sums gewoon even over mien pa hemmen wil. k Haar n goie pa. Nait dat ik hom nog aal mis mor deur dij fiets is e wel altied n beetje aanwezeg. k Heb ook n stel rooie buusdouken van hom. De beste buusdouken binnen dat, doar proest ik doagelks ien. Ik proest veul en geern. Ik hol van de ontloaden, t is, hail ien de verte, n soort flits-kloarkommen.

Aacht joar leden hillen wie t hoes van moe leeg. Ik heb toun heur waskniepers mitnomen en tussen mien aigen kniepers doan, zo denk ik bie was ophangen aan heur. Aal t wasgoud dat ze ien heur leven ophongen het. Eerst veur n gezin van negen, op t lest allain nog heur aigen goud.

Mien pa zien leste fiets, de doamesfiets, heb ik ook ien mien schuurke stoan. Veur as ik domment zulf bain nait meer over stang kriegen kin.

(Foto @ Jan Glas)

 

 

 

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

3 × twee =

Terug naar boven ↑
  • Literatuur activiteiten

    Geen nieuwe activiteiten