Column Chris Kiel, column

Gepubliceerd op 28 april 2017 | door Webloug

0

‘Aaier veur joen geld’ column van Chris Kiel

Aaier veur joen geld

Al meer as 25 joar kriegen wie om en bie Poaske n koartje oet Polen (leste joaren n mailtje) mit: Glück, Gesundheit und einen fleissigen Hase wünscht M. M. mit Familie. (M. M. was n muzikant dij mit zien groep oet Chelm Op Roakeldais optrad. Wie warren zien gastgezin. Vandoar.)
Tot van t veujoar heb ik docht dat ze in Polen mit Poaske n vlezege hoaze atten, in ploats van aaier. Dat dij hoaze nait vlezeg, mor vlieteg wezen mos en dus n baarg aaier veur ons in toene wegstoppen mos, was nooit tot mie deurdrongen. Beetje dom vanzulf, der ston ja fleissig nait fleischig, mor toch wel n beetje verkloarboar: veur mie (as Grunneger/ol Calvinist?) bestaait der nou ain keer gain poaskehoaze.
t Woord allain al. Poaskehoaze dat wil gewoon nait in t Grunnegs. Wie kennen hoast alles mit Poaske combineren. Ter Laan, Molema en Reker geven poask(e)aai, poaskebloume, poaskedoagen, poaskestoete, poaskevuur/bult, poaskepronk, en der is ook nog n Lutje Poaske, mor n poaskehoaze? Naargens.
Gain wonder. Pruif mor es. Dat woord, bedoul ik. n Fleischige hoaze zol ook mit Poaske prima smoaken vanzulf, mor t woord ken ik nait deur strötte kriegen, nait noar binnen, nait noar boeten.
Dat t fleissig wezen mos – vroag mie nait hou of t verband in mien hazzens legd wör, kwam deur de rekloame van de Hema mit n haile hoesholden van hoazen en de vergrelde reacties doarop.
Ik zol hoast tegen de Hema zeggen: ‘Nait weer, dij poaskehoaze, hol t op aaier,stoete en klaaier of wat mie betreft worst, as je niks beters waiten. Overbodeg, zo’n hoaze en je branden joe vingers der aan ja. Want de poaskerammeloar mag van sommegen gain hetero wezen en de poaskemoekehoaze mag ander hoazen(m.) kop nait gek moaken, want dat is seksistisch.’
En tegen lu dij tegen dij rekloame reclameerden: ‘Dou n fleischigen Hase (m. of v.) in de pot, mor wacht wel tot jacht weer open is. Hol t tot zolaank mor op aaier.’

Deel dit bericht
Share on Facebook
Facebook
Tweet about this on Twitter
Twitter
Share on LinkedIn
Linkedin

Tags: , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

2 + 15 =

Terug naar boven ↑
  • Literatuur activiteiten

    Geen nieuwe activiteiten