Algemeen

Gepubliceerd op 26 augustus 2014 | door Webloug

0

29, 30 & 31 augustus ‘PEERD’ en ‘Stranger Things Have Happened’ speulen The Timbertown Follies

Tiedens Noorderzon staait ter op 29, 30 en 31 augustus n biezundere veurstellen op de planken ien t der Aa-Theater ien Stad: ‘The Timbertown Follies’.

Ien 1914 barst Eerste Wereldoorlog lös. Nederland is neutroal. Mor vanoet België kommen doezenden vluchtelingen dizze kaant op. 1.500 Engelse militairen kommen bie ons ien Stad terecht. Ze bivakkeren aan t Engelse Kamp, n terraain vol mit barakken. Tegenwoordeg staait ter t cruiseschip van DUO/Belastendainst.
De Engelsen zulf nuimen zo’n terraain: Timbertown. Ien Timbertown wordt perbaaierd te ontsnappen aan t vervelen; der komt n voetbalclub, n toentjesverainen, n boukenclub en wat nait aal. En der wordt ien Timbertown theoater moakt. Onder laaiden van Fred Penley worden ‘The Timbertown Follies’ tot grond oet stampt. The Follies moaken Music Hall-veurstellens: variété mit bekende en zulfschreven laidjes, ofwizzeld mit roare, singeliere acts. Van de barakken van Timbertown trekken ze t haile laand deur: van Stadsschouwburg ien Stad tot aan t Kurhaus ien Scheveningen. Heur geluk is onverwacht en kin nait op…
En Stadjers waren tröts op heur Follies. As Eerste Wereldoorlog ien 1918 veurbie is, is t ien Stad din ook even stil…

Kiek veur meer informoatsie en koarten op www.deraatheater.nl 

The Timbertown Follies wordt moakt deur Stichting Peerd en de Engelstoalege improvisoatsie comedy group Stranger Things Have Happened oet Stad. Baaident perbaaiern ze The Follies weer tot leven te brengen. Veurstellen gaait over heur opkomst, mor ook over heur ondergaang. En t pebliek krigt n ienkiek ien t persoonleke leven van de Follies.

De veurstellen is ien t Grunnegs en Engels. Is dat n perbleem veur joe? Tussen 1914 en 1918 zat Stadsschouwburg ien Stad altied stampvol as The Follies optraden. En doudestieds begrepen Stadjers n bult minder goud Engels…

Noa de veurstellens op 29, 30 en 31 augustus ien der Aa-Theater, binnen der ien t zulfde theoater veurstellens ien september en oktober. Op 4 oktober speulen de Follies op de Dag van de Grunneger Geschiedenis.

Tags: , ,



Reacties zijn gesloten

Terug naar boven ↑
  • Activiteiten