Muziek

Gepubliceerd op 1 november 2013 | door Webloug

0

23 november Ede Staal-wandeling

De Grunneger zanger Ede Staal is inspiroatsiebron veur n zeuven kilometer laange wandeling deur Ter Wupping en Smeerling. Wandeling wordt drij moal holden op 23 november. Start- en eindpunt is Gasterij Natuurlijk Smeerling en onderwegens is der n stop veur kovvie en thee bie kovvie- en theeschenkerij De Meelschuur.

Wandeling is baseerd op de verhoalen dij de ien 1986 overleden Ede Staal vertelde tiedens zien vaste rubriek Zuzooien op zundagmörn op Radio Noord. Verhoalen over aaldoags leven, oaventuren en over de laifde. Herkenboare verhoalen vol nostalgie, woarvan de hoogtepunten verzoameld binnen op de cd Zuzooien.

Dizze verhoalen inspireerden Jeroen Fissering oet Vlagtwedde tot t schrieven van n serie van zes braiven, dij soamen t levensverhoal vertellen van n jong en n wicht, hou  ze verlaifd worden, traauwen, n gezin kriegen en old worden. De doagelkse zoaken, mor mit as dudelke rode droad t leven mit ale emootsies, keuzes, hoogte- en daiptepunten. De braiven worden onderwegens op zes lokoatsies veurlezen deur, zo meldt de organizoatsie, ‘Ede Staal zelf’.

Wandeling wordt organizeerd deur Gasterij Natuurlijk Smeerling en Theeschenkerij de Meelschuur. Wandeloars starten ien drij groepen. Ien elke groep is plek veur maximoal 30 wandeloars, woarnoa ienschrieven slut. Wandelroute is op n aantal plekken verlicht mor t is roadzoam om n buuslaamp mit te nemen. Noa de wandeling is der ien Gasterij Natuurlijk Smeerling livemuziek: Marlene Bakker zingt laidjes van Ede Staal.

Wandeling is op 23 november vanof 16:00, 18:30 en 19:30 uur. Dailnoame kost 6 euro, kovvie, thee en wat lekkers veurof ienbegrepen. Joe opgeven kin tot en met 20 november bie de Meelschuur: 0599-332578 of meelschuur@hotmail.com of bie Gasterij Natuurlijk Smeerling: 0599-312611 of info@gasterij-natuurlijk-smeerling.nl

Tags: , ,



Reacties zijn gesloten

Terug naar boven ↑
  • Muziek activiteiten

    Geen nieuwe activiteiten