Uncategorized

Gepubliceerd op 25 februari 2014 | door Webloug

1

21 meert kenniskwis ‘Looste Grunneger’ ien Lösdorp

Bie wieze van n ommekeerd verhoal…

Zunder t Grunnegers gain Fraans

(zunder Grunnen gain Frankriek!)

Meschain hebben je der noeit recht bie stille stoan, mor dou de Fransozen n joar of wat bie ons touhuilen en de macht in pacht haren hebben ze veur t gemak hail wat Grunneger woorden en uutdrukkens noar t Fraans tou overnomen.
t Grunnegers is as t om t belang van zien stoatus as de grootste wereldtoal gaait mit niks of naks te verglieken. Noa n dege onderzuik bin k din ook gaauwachteg tot d’opvatten kommen dat ons toal de mouder van alle toalen in de wereld is. Ik hol mie dizz’keer bievubbeld eefkes bie t Fraans. Fraanse veurolders hebben zotrekend op ale fronten t Grunnegers in aal zien kleur en fleur overnomen . Zukswat kinje bievubbeld hail goud zain aan haand van n aantal veurbeelden. Meschain zellen ie joe der ook over verwondern. Wat dochten je van d’bekìnde Grunneger uutdrokken ‘affeer’, wie bruken dit om mit aan te geven wat aine zo dag en deur veur de kost dut. In t Fraans is dit verbasterd noar affaire. As ain goud mit nkaander opschaiten kin din zeggen wie, dat ze goud kinnen akkedaaiern. De Fransozen hebben doar accorder van moakt. As n Grunneger wat schiers kocht het wat hom goud bevaalt, din vragt de verkoper wel ais of zij of hai hom aanrekommedaaiern wil. Ie haren t al zain in t Fraans wuir dat deur de tied recommander. En aine dij der tou kepoabel is gaait in t Fraans richten capable. En in Grunnen bruukt men te pas en te onpas komsa. En zotrekend de Fransozen hebben dat ook weer van ons overnomen; comme ca. In t Grunnegers wordt der al sund joar en dag wat òf-aaierd mit waarkwoorden. Wat dochten je van fiegelaaiern, filtraaiern en fiezentaaiern. En aaltied mor weer traaitern.
Tjah en as je din ook nait tou n besloet kommen kinnen, din blift t vanzulf bie t nait resolvaaiern kinnen. Onze Grunnger toal het zoveul riekdom en dat begunt op te valen as wie in t boetenlaand binnen, as je der oog en oor veur hebben din kommen je al gaauw tot n inzicht dat n rezenoabele Grunneger wat zien toal aanbelaangt superieur en aaid nummer AINE is. Wie kinnen hier dus groots en kontent op wezen. Traauwens bie wieze van besloet, dit akkefietje het n paus in laankmanstied ook al in t Latien verbasterd noar aqua vita. t Is mor dat je t waiten…

Henry Scholte

Tags: , ,



One Response to 21 meert kenniskwis ‘Looste Grunneger’ ien Lösdorp

  1. Pingback: » 21 meert kwis ‘Looste Grunneger’ ien Lösdörp | Webloug

Terug naar boven ↑