Algemeen

Gepubliceerd op 12 mei 2013 | door Webloug

0

17 maai Benefietfestival veur meulen David ien Den Andel

Op vrijdag-oavend 17 maai zel der n benefietfestival wezen veur meulen David op Cultuurerf Andledon op nAandel. Stichten Behoud Molen De David hoopt mit t festival geld bie nkander te kriegen veur restauroatsie van dizze biezundere zoagmeulen. t Festival is opbaauwd rond vertelsels, gedichten en meziek dij verband holden mit biebelse herder Doavid dij t opnam tegen reus Goliat.
n Dail van t pergram is ien t Grunnegers.
Lianne Abeln zingt vaaier laiden van Fedde Schurer, ain was aal vertoald deur David Hartsema, dij op Zoltkamp en Lauwersoog woonde, drij het Lianne zulf veur dit gebeuren overzet ien t Grunnegers. Ale vaaier binnen laiden over Doavid. Wieders zel zai n keus moaken oet heur laiden dij zai ook zingt ien Grunneger dainsten.
Klaas Pieterman leest psaalms ien t Grunnegers en Willem Tjebbe Oostenbrink leest zien Psaalm 151 veur doar e Biebelvertoalslag 2013 mit wonnen het. Ook t beeldend kunstwaark, n keramiek, van Anneke Wiersema doar zai Biebelvertoalslag 2013 mit wonnen het, staait tentoonsteld. Wieders binnen der optredens van Gritter (poëzie) Arjan Miedema (psalmen), Marlijn Nijboer(verhaal) en Gooyke van der Schoot (lier en samenzang). Johan van Dijk, siktoares van stichten Behoud Molen De David, zel vertellen over meulen David, en haile oavend zellen der foto’s te zain wezen van restauroatsie.
Lutje meulen David dij aan t ind van negentiende aiw baauwd is, is van oorsprong n proufmeulen; hai was bedould om ervoaren op te doun mit t systeem van t zulfswichten. Noa n joar of wat wer David ombaauwd en as n klaaine industrie-meulen ien Taisen (Thesinge) hin zet, doar e n lintzoag en n sliepstain aandreef. Tegenswoordeg is meulen David ainegste zoagmeulen van dij grootte dij nog bestaait. Stichten Behoud Molen De David dut zien uterste kuren om geld bie nkander te kriegen dat meulen restaureerd worden kin. Bedoulen is om David van t joar nog tiedens t Open Monumentendoagen zien definitieve plek te geven ien t Openluchtmuseum ien Waarvem (Warffum).
Annette Broekhuizen, veurzitter van Stichten Behoud Molen De David: “We werken nog steeds heel hard om het geld dat nodig is voor de restauratie binnen te halen. De programmering van Andledon staat voor een groot deel in het teken van muziek, verhalen en poëzie, zodat de koppeling naar de figuur van David met zijn verhalen, psalmen en muziek snel gemaakt was”.

t Benefietfestival op Cultuurerf Andledon, Kruusweg 6 op nAandel, begunt vrijdag-oavend 17 maai om 19:30 uur. Auto kin je kwiet aan Streekweg of aan Oosterweg op nAandel. Meer ienformoatsie is te vienden op www.andledon.nl en op www.molendedavid.nl.
Ientree is € 5, mor meer mag ook, b.b. veur ain persoon twij koartjes.
Reserveren huift nait, mor is wel handeg veur bezuiker en veur t comité, info@andledon.nl of annette.y.broekhuizen@xs4all.nl, 0595 571913.


Tags:



Reacties zijn gesloten

Terug naar boven ↑
  • Activiteiten