Literatuur

Gepubliceerd op 29 maart 2014 | door Webloug

0

11 april ‘Terug noar t Poeldiep’ mit gedichten, verhoalen en muziek

Op 11 april organiseert de Culturele Road n biezundere culturele oavend ien Kerkplein 6. t Pregrammoa ‘Terug noar t Poeldiep’ wordt verzörgd deur kunstenoars die heur woddels hemmen ien Gruupskerk met poëzie en verhoalen ien t Westerkertiers: dichters Are Meijer en Willem Tjebbe Oostenbrink, verhoalenverteller Sjoert van der Naald en muzikant Roelf Postma. Et belooft n biezundere oavend te worden.

Are Meijer is dichter en liedjesschriever ien t Westerkertiers, Nederlaands en Engels. Liedteksten van hem werden op meziek zet. Zien Grunnegstoalege gedichten bennen uutgeven ien de bundels ‘Lösloaten’ en ‘Keern’. Twee Nederlandstoalege gedichten warren bij de 100 beste gedichten van de Turing Nationale Gedichtenwedstrijd 2012. Grunneger poëzie van hum is ok te vienden op t sportcomplex van voetbalver. Gruupskerk.

Sjoert van der Naald is toneelregisseur en verhoalenverteller. Hij regisseerde verscheidene toneelproducties ien Knoal en van Rederiekerskoamer Nicoloas Griep en openluchtspeulen ien Grodegast en Gruupskerk. Doarnoast was er betrokken bij de regie van t spektoakel ‘Het Ruige Paradijs’ en drie Swet-producties. As verhoalenverteller trad hij op ien e landerijen rondom Niebert en Nuis veur t vertelproject van t Groninger Landschap. Op t heden is er regisseur bij toneelver. Dukdalf te Zoltkamp.

Willem Tjebbe Oostenbrink dicht en droagt veur ien t Westerkertiers. In 2010 ontvong er de Freudenthal Aanmoedigingspries veur nije Nedersaksische literatuur. Noajoar 2013 debuteerde er met e dichtbundel ‘Opdreugde troanen’ bij uutgeverij Philip Elchers. Met t heden as vertrekpunt keert er ien heldere beelden terug noar zien geboortegrond, moakt de lezer deelgenoot van originele observoatsies, voak met n septiele dubbele loag. Zien poëzie oademt warmte, humor, liefde veur de toal en cultuur, op t eerste oog verbonden met zien geboortegrond, t Grunneger Westerkertier, bij noadere beschaauwing breder, universeler.

De meziek van e oavend wordt verzörgd deur paukenist en slagwerker Roelf Postma. Hij het warkt bij verscheidene orkesten, zo as Nederlands Orkest en ‘L’Orchestre Particulare’, bekend van het tv-programma ‘Una Voce Particulare’ en bij musicals van Joop van den Ende. Postma is as artistiek leider actief bij muziekgezelschap Procussion Westerkwartier. Oflopen joar was er initioator van ‘Carmina Burana’ van C. Orff die uutvoerd is met t schoelorkest van Kunstbedrijven.

Kerkplein 6, Gruupskerk
Inloop: 19.45 uur. 
Entree € 6,00

Koarten veur veurverkoop bij boekhandel Hoekstra Gruupskerk en bij de bibliotheek Zuudhörn.

Foto: (vlnr) Sjoert van der Naald, Are Meijer, Roelf Postma, Willem Tjebbe Oostenbrink.
moakt deur: Peter van der Weele

Tags: , , , ,



Reacties zijn gesloten

Terug naar boven ↑
  • Literatuur activiteiten

    Geen nieuwe activiteiten