Banner DGT 2017


Column Fieke Gosselaar, column

Gepubliceerd op 1 december 2017 | door Webloug

0

‘Regen’ column van Fieke Gosselaar

Regen

Onze katte is nait van suker. Ook mit regen wil ze noar boeten tou. ‘Waist zeker?’ vroag ik en kiek noar doaken van schuurtjes, plassen in toenen en zai dikke druppen. Ze snelt al tussen kier van deure deur. In hoes zitten vindt ze nog aarger den nat worden.
Ik denk dat dat op zich ook veur mainste minsen geldt, al heur ik mien onderbuurman wel ais bliede roupen hou goud aal dij tillevisieseries wel nait binnen. Hai kin der haile nachten noar kieken. Den sloapt hai overdag. Zo kinst ook mit aal dij regen omgoan.
t Aargste vin ik as t hoes smörns nog kold aanvuilt en mien bèrre waarm. Wie worden wakker van onze dochter en motten deroet. ‘Huu!’ zeggen wie en trekken der sokken bie aan. Onze katte zit al te wachten op t balkon en wil weer noar binnen tou, mui van n laange nacht mit natte moezen. Deurwaikt is ze nait, dus woar ze oethangt? Overdag in elk geval oetteld op baanke.
Ik fiets laangs t paark noar mien waark en zai minsen lopen mit capuchons over heur heufd en ain haand in buutse en aander haand aan n liene. Heur hondjes lopen veur heur oet. Bliede dat ze weer frisse locht in kinnen, zuiken ze n geschikte boom. t Weer deert heur nait.
’t Is hondeweer,’ zeg ik altied tegen onze katte, mor zai wait t beter. Minsen hebben gewoon n vachtje neudeg. n Vachtje dij vanzulf dikker wordt as moanden laanger klinken (november, december). Regen tikt tegen t roam. Duuster, alles vochteg en kold.
Wacht mor tot t snijen begunt, t ies komt en doagen worden kört, körter, körst: de winterwende. Duurt nog n poar weken. Onze vachtjes, dekentjes op baanke, motten slimmer om ons tou. Wie motten dichter tegen nander aan en katten motten op schoot. Sukkeloa, Speculoas, peperneuten, waarme sukkeloademelk. Wie motten onze aigen vachtjes kweken.

Share on FacebookTweet about this on TwitterEmail this to someoneShare on LinkedInShare on Google+Pin on Pinterest

Tags: , , , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

6 + twintig =

Terug naar boven ↑
  • Literatuur activiteiten

    Geen nieuwe activiteiten