Banner DGT 2017


Column Jan de Jong, column

Gepubliceerd op 13 juli 2017 | door Webloug

1

‘Nittjen’ column van Jan de Jong

Nittjen

Nee hè! Dat zel toch nait woar weden?
Ik zit as vroren op baank. Tong vuilt over baaide veurtanden. Benaauwd swait brekt mie aan aal
kanten oet. k Hol oam vaast.
Tong vuilt nog ais goud, en din aan binnenkaant. Is der no n stukje lös? Of òfbroken? Moag krimpt mie der van.
Mit n puulstokje oet keukenloa vuil k hail verzichteg tusken tanden deur. Is toch wat nait goud.
Vaalt wat op tong. Oam stoekt en lopt mie n rillen over rug. Doar hest gesodemieter.
Mit mien kwak lös loop k noar hal en kiek ien spaigel. n Trillende bledder komt langzoam noar
boeten. k Stìn en hoal hail daip oam, tandebozzel is ien ru. Ligt n plestieken hoarke.
Mit n kopvol kovvie op baank kom k even loader weer wat bie en kin k hail wereld weer aan.

‘Ik zol mie mor zo’n elektrieze hoalen’, zegt vraauw. ‘Mor doe wilst toch nait luustern. Dikke
schiethoas.’
k Huif nait te waiten wat of der nog meer komt. As k hond raim om dou ien t halletje heur k heur nog schottern. Gain groder vermoak as leedvermoak.

Al binnen koezen reud, ze jeuken mie der nog van as k der aan weerom denk. k Haar kop dik van
koespien dou en der zat niks aans op, of zai mit mie noar tandarts wol. Noa joaren en joaren nooit nait hin west weden. Ze zee niks, knees en haar jas en autosleudels kregen.
Tandarts bromde, en din zeg k het hail netjes. En hai bromde nog veul haarder dou t hoakje aal houken en hörns bielaangs ging.
Weerom ien auto noar hoes mos ze onbedoarlek lagen. Eerstkommende doagen noatied ook. En nog voak, zo mor ais. Zéker twij moal ien t joar. En benoam bie: ‘Wat nou? Most weerkommen mien jong?’
Ik zeg der mor niks op. En zolaank ik mie tandebozzel nog nait ien neusgat of ogen steek. Wat mout dat wel nait kosten zo’n nijmoods ding?
Al kin k meschain vanzulf wel ais foldertjes kieken noar zo’n bozzel.
Tied van eerst tanden trekken veur traauwen is ook ja al laank veurbie.

Share on FacebookTweet about this on TwitterEmail this to someoneShare on LinkedInShare on Google+Pin on Pinterest

Tags: , , , , ,



One Response to ‘Nittjen’ column van Jan de Jong

  1. jelou says:

    Och nog an toe….ik zie je al voor die spiegel staan….. 😉
    En heb je nog zo’n nijmoods ding gekocht ooit??
    Of werd het een kunstklapper??

    Grijnzzzz…. 😉

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

vier + 15 =

Terug naar boven ↑
  • Literatuur activiteiten

    Geen nieuwe activiteiten