Banner DGT 2017


Muziek Roelofs

Gepubliceerd op 9 juni 2017 | door Jan Glas

0

Maaike Roelofs over ‘Lienen an Locht’ en optreden 24 juni

Gedichten van Lerus Roelofs verklankt.

Maaike Roelofs vertelt over heur voader en de cd ‘Lienen an Locht’.

Veur n poar joar wer ik ien Zeeuws-Vlaanderen, bie hom thoes, nuigd deur muziekoetgever en producer Hans Kusters. t Leek hom meroakels om de gedichten van mien pa, Lerus Roelofs, te vertoalen noar muziek. Ik zol dij laiden din zingen en speulen en doar n cd van moaken. n Reuzengrote oetdoagen!

Mien pa Lerus Roelofs (Odoorn, 1917 – Amersfoort, 1997) waas jurist en dichter. Hai het aacht gedichtenbundels publiceerd, mainste gedichten ien t Grunnegers. Hai schreef in de toal van zien ollu, t Oldambtsters.
t Oldambtster noatuurgebeuren waas n belangrieke inspiroatsiebron veur hom. In de seizoenen en de noatuurkrachten zöcht de dichter noar antwoorden over leven en dood. Lerus Roelofs’ poëzie het n mystieke of religieuze inslag. Hai waas op zuik noar aiweghaidsweerden. Noar t blievende, noar dat wat boven t alledoagse oetstiegt. Onder aandern in t laid “Raait” komt dit staark noar veuren.
Paul Prenen, pianist, componist, arrangeur het mainste laiden van cd veur zien reken nomen. Ook bie ‘’Raait’’ het e prachtege meziek schreven.

Raait

Oavendwind
van over t woater
flustert duuster
in het raait,
toefkes wiezen
aalmoal ainder
woar de wind
zien waagjes waait,
k heur zaacht stemkes
t zulfde zingen…
al begriepen wie het nait,
zitten lienen in ons leven
tussen tied en aiweghaid –
oamt de wind van over t woater,
flustert,
lustert,
in het raait –

Martha Roelofs, Stephan Jankowski, Hanneke Hoogerwerf en ikzulf hebben weer hail aander laiden componeerd. Doarom binnen laiden op cd hail ofwizzelnd van stijl.
Verder waarkten mit: mien zusters Tjamke (viool) en Liesbeth (melodica) en mien neef Remco (slagwaark). Marjolijn van Roon speult blokfluit en Jesse Faber klarinet.
t Dialect van mien pa waas t Oldambters. Hai pruit dit vrouger allain mit zien femilie. Omdat Ik oetsproak van t Grunnegers veur dit project leren mos, heb ik oetsproakles nomen van Jan Sleumer, köster Grunnegers (vertoaler van dizze tekst). Jan woont in Amsterdam, net als ik, dus dat kwam goud oet.
Hans Kusters het Jan Mulder, die oet t zulfde kontraain as mien pa komt en dus hetzulfde dialect prat, vroagd om de gedichten op de cd veur te droagen. Dat geft de cd n singeliere touch!

Körtsleden is ons cd Lienen aan Locht oetkommen en op zoaterdag, 24 juni a.s. wordt e prizzentaaierd in de Doopsgezinde kerk in de Oude Boteringestraat 33 in Stad.
Aanvang 15.00. Prizzentoatsie is in de vörm van n concert, woarbie Jan Sleumer gedichten van Lerus Roelofs veurdroagen zel.
Noa ofloop is der ook nog wat dikdakkerij. Ie/doe worden van haarten nuigd om der bie te wezen.

Tekst is vertoald deur Jan Sleumer.

Share on FacebookTweet about this on TwitterEmail this to someoneShare on LinkedInShare on Google+Pin on Pinterest

Tags: , ,



Geef een reactie

Het e-mailadres wordt niet gepubliceerd. Verplichte velden zijn gemarkeerd met *

drie × 4 =

Terug naar boven ↑