Banner DGT 2017


Column Jan Glas

Gepubliceerd op 31 januari 2018 | door Jan Glas

0

‘Elke Grunneger wait t altied beder’ column van Jan Glas

Elke Grunneger wait t altied beder

Tiedens Poëzieweek was der ofgelopen dunderdag 25 jannewoarie weer n Grunneger dichtersoavend bie boukhandel Goder Walter ien Stad. Nina Werkman, Lammert Voos en Hanne Wilzing lazen veur. Marlene Bakker zong, begelaaid deur Bernard Gepken. Aly Freije was as presentatrice weer op heur aller charmantst. Zoak zat vol. Lu genoten.

Marlene Bakker heur ollu proaten onder nkander Grunnegs, mor tegen de kiender Nederlands, zoas zoveul Grunneger olders dat deden en doun. ‘Achteròf schane,’ zeggen voak nait allain de olders, mor ook de kiender. Vrouger wer der docht en nog aal wordt der docht dat kiender dij dialect proaten nait veur vol aanzain worden ien rest van Nederland. Doardeur proaten aal minder jongern t dialect. Mor bie summegen gruit t besef dat mit t verlais van t Grunnegs der meer as allain n toal verloren gaait. Elke toal kikt aans tegen t leven aan, het aigen woorden en oetdrukkens om t leven te duden en te begriepen. Elke toal het doar n hail aigen handeghaid ien. Ien dij handeghaid zit de unieke schoonhaid van elke toal.

Marlene Bakker is heur bewust van dij hail aigen schoonhaid en bruukt t veur heur muziek. Ze zingt ien t Grunnegs. Ze het de toal dij ze vrouger as kiend om heur tou heurde zulf leerd en heur eerste cd ‘Raif’ komt ien meert oet. Zingen ien t Grunnegs gaait hail best, mor proaten is wat aans, is lasteger. Je kinnen nait zoas bie zingen eerst alles secuur oetschrieven en din oplepeln. Zo waarkt direkte communicoatsie nait.

Bie Godert Walter besloot Marlene om de tussenproatjes ook ien t Grunnegs te doun. Ik zaag heur ter plekke Nederlandse zinnen en woorden vertoalen op zuik noar t juuste Grunnegs. n Luk beetje onzeker, want der waren Grunnegers ien de zoak.

Ze bruukte t woord ‘loatst’ ien n zin. Ien rieg achter mie siste vot n vraauw t woord noa: ‘loatst’!! Want dat mot vanzulf ‘lest’ wezen. En zo siste ze meer woorden noa dij volgens heur nait Grunnegs genog waren. Van dat gesis kon ain nog wel ais flink kopschaauw worden, mor Marlene prout dapper deur.

En ik hoop dat ze deurproaten blift, tegen aal t gesis van de Grunnegers ien. De Grunneger is nait zo gul mit zien toal en elk Grunneger het zien aigen opvattens over wat geef Grunnegs is. Voak doof veur t gegeven dat n toal dij nog aal bruukt wordt ook aalgedureg verandert, simpelweg om bie de tied te blieven.

Ik ken n Italioan dij hail goud Nederlands proat. Hai wil geern dat ik hom verbeder as e n fout moakt. Dat dou ik, omdat e doar om vroagd het.
Lest zee e: ‘Ik fietste onder de regen’. Prachteg. Hou dichterlek is dat?!

Mor ofsproak is ofsproak, mit pien ien mien dichtershaart corrigeerde ik hom. Ik zee: ‘Het is: ik fietste in de regen.’

Share on FacebookTweet about this on TwitterEmail this to someoneShare on LinkedInShare on Google+Pin on Pinterest

Tags: , , , , ,



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

10 − 10 =

Terug naar boven ↑